Өнөөдөр Баян-Өлгий, Увс, Говь-Алтай аймгуудад хүчтэй цасан шуурга эхэлсэнтэй холбогдуулан зарим аймгийн чиглэлд хот хоорондын нийтийн зорчигч тээврийн үйлчилгээг түр хугацаанд зогсоосон талаар Авто тээврийн үндэсний төвөөс мэдээллээ.

Тодруулбал,

• Увс,
• Завхан,
• Ховд,
• Говь-Алтай,
• Баян-Өлгий,
• Баянхонгор,
• Өвөрхангай,
• Архангай,
• Хөвсгөл аймгийн чиглэлд хийгдэх нийтийн тээврийн үйлчилгээг зогсоосон байна.

Мөн Увс, Говь-Алтай, Баян-Өлгий, Завхан, Өвөрхангай, Архангай, Баянхонгор аймгийн онцгой байдлын газраас тухайн чиглэлд энэ сарын 3, 4-ний өдрүүдэд тээврийн хэрэгслийн хөдөлгөөнийг хязгаарлах шийдвэрийг гаргасан.

16.00 цагийн байдлаар алслагдсан аймгуудын чиглэлд хоног дамнаж яваа нийт 21 тээврийн хэрэгсэл байна. Эдгээр тээврийн хэрэгслийг дундын дайран өнгөрөх аймгуудад суурин газар бараадуулж хоноглуулахаар болжээ.

Хүчтэй салхи шуурганы улмаас төөрөх, шуурганд уруудах, зам даваа хаагдах, хальтиргаа гулгаа үүсэх, тээврийн хэрэгсэл цасанд боогдох, саатах, утсан холбоо тасрах, шатах тослох материалын нөөцгүй болох зэрэг эрсдлээс урьдчилан сэргийлэх, ойрын өдрүүдэд орон нутгийн зам гарахгүй байхыг АТҮТ-өөс анхааруулж байна.

Мөн өнөө шөнө  Архангай, Өвөрхангай, Булган, Сэлэнгэ, Төв, Дундговийн нутгаар, маргааш өдөр Төв, Хэнтий, Дундговийн нутгаар хүчтэй цасан шуурга шуурч, өнөө шөнө Өмнөговийн нутаг, Өвөрхангайн өмнөд хэсгээр, маргааш өдөр Өмнөговь, Дундговь, Дорноговийн нутгаар салхи секундэд 18-20 метр, зарим үед секундэд 24 метр хүрч ширүүснэ гэдгийг Ус цаг уур, орчны шинжилгээний газраас анхаарууллаа.