Нийслэлийн Иргэдийн Төлөөлөгчдийн Хурлын Тэргүүлэгчид өнөөдөр хуралдаж дараах асуудлуудыг хэлэлцлээ.

Нийслэлийн ахмадын хорооны дарга М.Болд Нийслэлийн Ахмадын сангийн дүрэм, зөвлөлийн бүрэлдэхүүнийг шинэчлэн батлах тухай танилцууллаа. Үүнд, Нийслэлийн ИТХ-ын Тэргүүлэгчдийн 2006 оны 18 дугаар тогтоолоор батлагдсан ахмадын сангийн дүрмийн заалтуудыг амьдралд хэрэгжүүлэх явцад зарим зүйл заалтад нэмэлт өөрчлөлт оруулах, найруулга хийх, ахмад настны нийгмийн хамгааллын тухай Засгийн газрын 2008 оны 162 дугаар тогтоолд ахмадын сангийн талаар тодорхой заалтууд тусгагдсаныг үндэслээд дүрмийг шинэчлэн батлуулахаар болжээ.

Мөн өнгөрсөн хугацаанд зөвлөлийн гишүүдийн идэвхи оролцоо сул, зарим хүмүүсийн ажил өөрчлөгдсөн зэргээс шалтгаалан ахмадын сангийн зөвлөл дүрмийн дагуу ажиллаж чадаагүйг харгалзан Нийслэлийн ахмадын сангийн зөвлөлийн бүрэлдэхүүн, дүрэм, хяналтын зөвлөлийг шинэчлэн баталж, энэ тогтоол гарсантай холбогдуулан НИТХ-ын Тэргүүлэгчдийн 2006 оны 18 дугаар тогтоолын 1,2 дугаар хавсралтыг тус тус хүчингүй болголоо.

Орон нутгийн сонгуулийн зардлын хэмжээг батлах тухай Нийслэлийн ИТХ-ын Тэргүүлэгчдийн нарийн бичгийн дарга П.Хангал танилцуулж МУ-ын Орон нутгийн сонгуулийн тухай хуулийн 32.1 дэх заалтыг үндэслэн Нийслэлийн ИТХ-ын Тэргүүлэгчид нам, эвсэл, нэр дэвшигчээс орон нутгийн сонгуулийн тойрогт зарцуулах зардлын дээд хэмжээг тогтоолоо.

Мөн НИТХ-ийн тэргүүлэгчдийн хурлаас, БНХАУ-ын Бээжин хотноо болсон зуны ХХIX олимпид жүдо бөхийн төрлөөр амжилттай оролцон алтан медаль хүртэж, эх орныхоо нэр алдрыг дэлхийн тавцанд цуурайтуулж, нийслэлчүүдийн бахархал, хүндэтгэлийг зүй ёсоор хүлээсэн, олимпийн аварга, МУ-ын хөдөлмөрийн баатар, гавъяат тамирчин Найдангийн Түвшинбаярыг “Нийслэлийн хүндэт иргэн”-ээр, буудлагын спортын хийн гар бууны 25м-ийн төрөлд ажилттай оролцон мөнгөн медаль хүртсэн МУ-ын Гавъяат тамирчин Отрядын Гүндэгмааг “Хангарьд” одонгоор тус тус шагнахаар шийдвэрлэлээ.

Цаашид Зуны олимпийн Их наадмаас медаль хүртсэн тамирчдыг “Хангарьд” одонгоор шагнаж байхаар боллоо.