Үндэсний цэцэрлэгт хүрээлэнд өнөөдөр, маргааш  “Улаанбаатарын өвлийн наадам” болно.

Тав дахь жилдээ уламжлал болгон зохион байгуулж буй энэ наадмын үеэр 3,5 метрийн диаметртэй том тогоонд мастер тогооч нар цуйван сэгсэрч хоолны шоу үзүүлбэр үзүүлэн хүрэлцэн ирсэн иргэдийг дайлах юм.

Мөн гэр бүлийн буухиа тэмцээн болон олс таталтын тэмцээнийг зохион байгуулах гэж байна.

Гэр бүлийн буухиа тэмцээнд нэг багийн бүрэлдэхүүн /аав, ээж, эсвэл эмээ, өвөө, 12 хүртэл насны 1 хүүхэд/ 3 гишүүнтэй байх бол олс таталтын тэмцээний нэг баг 5 эрэгтэй, 3 эмэгтэй гишүүдийн бүрэлдэхүүнтэй байна.

Гэр бүлийн буухиа тэмцээн 11.00-13.00 цагийн хооронд, олс таталтын тэмцээнийг тухайн өдрүүдийн 13.00-16.00 цагийн хооронд явагдах бөгөөд тэмцээн тус бүрт эхний 1, 2, 3 байр эзэлсэн багуудыг өргөмжлөл, ивээн тэтгэгч байгууллагын шагналаар шагнана.

Энэхүү наадмаар залуучууд снөүбоард, рагби, тэшүүр, мөсөн хананд авиралтын үзүүлбэр тэмцээнүүдийг сонирхож, өвлийн дугуй, нохой чаргаар гулган амьтадтай зураг даруулах боломжтой юм.

“Улаанбаатарын өвлийн наадам”-аар гадаад дотоодын жуулчдад Монголын ёс заншил, өв уламжлал, үндэсний тоглоом наадгай, соёлыг сурталчлан таниулах, шинэ тутам хөгжиж буй нийтийн биеийн тамир, спорт, аяллын төрлүүдийг иргэдэд сурталчлах ач холбогдолтой юм.

Тус наадмын үеэр зохиогдох уралдаан тэмцээн болон ивээн тэтгэгчдийн нийт шагналын сан 10 сая төгрөг бөгөөд улиран одож буй Гал тахиа жилээ үдэн гэр бүлийн хамт амралтын өдрүүдээ зугаатай өнгөрүүлээрэй.