Харилцаа холбоо, технологийн салбарын шинэ мэдлэг, инноваци, ирээдүйн чиг хандлага, хөрөнгө оруулалт болон бодлогын асуудлыг хэлэлцэн туршлага солилцох “Tech-week 2025” арга хэмжээ 9-р сарын 19-26-ны өдрүүдэд зохион байгуулагдаж байна.

Энэхүү арга хэмжээний хүрээнд 9-р сарын 22-нд “Future Tech” сэдвийн дор зохион байгуулагдсан клауд технологийн талаарх салбар хэлэлцүүлэгт Мобиком Нэтворкс ХХК-ийн Гүйцэтгэх захирал, Б.Отгончимэг (Ph.D)  үндсэн илтгэгч, панелистаар оролцож “Клауд технологи болон түүний сорилтууд” сэдвээр илтгэл тавилаа.

Илтгэлдээ тэрээр AWS Outposts клауд серверийг Монголын нутаг дэвсгэр дээр анх удаа суурилуулж шинэлэг үйлчилгээг нэвтрүүлж буйг онцолсон ба клауд технологийн хэрэглээг дэмжихэд тулгарч буй сорилтуудыг хэлэлцүүллээ.

Хэлэлцүүлэгт Цахим хөгжил инновац харилцаа холбооны яам, Харилцаа холбооны зохицуулах хороо, И-Монгол академи, Үндэсний дата төвөөс гадна үүрэн болон суурин холбооны оператор компаниуд, уул уурхай, банк, санхүүгийн салбарын төлөөллийг багтаасан төр, хувийн хэвшлийн 50 гаруй оролцогч оролцлоо.

Тэд клауд үйлчилгээний зохицуулалт, эрх зүйн орчин, дэд бүтцийн бэлэн байдал, нэвтрүүлэх үйл явцад тулгарч буй асуудлууд болон тэдгээрийг шийдвэрлэх боломжийн талаар нээлттэй санал солилцлоо.