Монголын сэтгүүлчдийн нэгдсэн эвлэлээс нэр бүхий сэтгүүлчдийг тагнаж, чагнасан асуудлаар хэвлэлийн бага хурал хийж байна.

Өнгөрсөн лхагва гарагт болсон Хэвлэл мэдээллийг ёс зүйн форумд УИХ-ын гишүүн Х.Нямбаатар оролцсон бөгөөд нэр бүхий сэтгүүлчдийг тагнаж, чагнасан талаарх мэдээллийг Тагнуулын ерөнхий газарт өгсөн хүсэлтийн хариугаар нотолсон гэдгээ хэлсэн юм.

Энэ асуудлаар нэмэлт тодруулга авахаар УИХ-ын гишүүн Х.Нямбаатарт өчигдөр хандсан ч утсаар болон биечлэн уулзаж чадаагүй гэдгээ мэдээллийн эхэнд хэллээ. 

МСНЭ-ээс "2018 онд есөн сэтгүүлчийг тагнаж чагнасан асуудал анх хөндөгдсөн. Тухайн үед холбогдох газруудад хүсэлт тавьсан ч өнөөдрийг хүртэл мэдээлэл өгөөгүй. Харин УИХ-ын гишүүн Х.Нямбаатар долоон сэтгүүлч гэсэн мэдээллийг өгсөн. Албан бичигт хариу өгдөггүй хэр нь энд тэнд хов жив шиг ярьж явдаг. Бид зөвхөн сэтгүүлчийн талаар яриагүй. Сэтгүүлчийн ард уншигч, сонсогч, иргэдийн мэдэх эрх байгаа гэдгийг ойлгох ёстой" гэсэн юм. 

Анх мэдээлэл гарсан цагаас эхлээд МСНЭ-ээс энэ асуудлаар холбогдох байгууллагуудад хандсан ч одоог хүртэл албан мэдээлэл өгөхгүй байгаа тул цаашид Хүний эрхийн үндэсний комисс, олон улсын байгууллагад хандана гэдгээ мэдэгдлээ.