2023 онд Банк бус санхүүгийн байгууллагын нийт зээл өмнөх оноос 35 хувиар өсөж, 3.6 их наяд төгрөг хүрснийг Санхүүгийн зохицуулах хороо тайлагналаа.

Тайлант хугацаанд чанаргүй зээлийн нийт зээлд эзлэх хувь 0.6 нэгж хувиар буурсан бол зээлийн жигнэсэн дундаж хүү өмнөх оноос 0.2 нэгж хувиар өссөн байна.

Банк бус санхүүгийн байгууллагын нийт харилцагчдын тоо давхардсан тоогоор 4.5 сая хүрсний 94.1 хувийг финтекийн харилцагчид эзэлжээ. Цахим хэрэглээний зээл эрэлттэй байсныг салбарын компаниудын тайландаа онцолж байлаа. Тухайлбал: “ЛэндМН ББСБ” ХК өнгөрсөн онд 996.6 тэрбум төгрөгийн дүнтэй 3.3 сая зээлийг цахимаар олгосныг тайлагнажээ.

Зээлдэгчдийн тоо жил бүр өсөж, зээлийн эрэлт өндөр байгаатай холбоотой Банк бус санхүүгийн байгууллагууд нэмэлт зээлийн санхүүжилт татахаар бонд гаргах хөдөлгөөн сүүлийн жилүүдэд идэвхтэй байна. Өнгөрсөн онд “ЛэндМН ББСБ” ХК дөрөв дэх удаагийн “Лэнд бонд” гаргаж, есөн тэрбум төгрөг татан төвлөрүүлсэн юм. Мөн “Сэндли ББСБ” ХК бонд гаргаж, 8.5 тэрбум төгрөг татан төвлөрүүлж байв.

2021 оноос хойш Монголын Хөрөнгийн биржид Банк бус санхүүгийн долоон байгууллага бонд гаргаж, нийт 128.1 тэрбум төгрөг татан төвлөрүүлжээ.

Сэтгүүлч: Б.Энхжин