XVII жарны "Илжиг" хэмээх төмөр туулай жилийн сар шинийн баярт зориулсан хүчит бөхийн барилдаан өчигдөр Бөхийн өргөөнөө хурсан олны шуугиан дор болж өндөрлөлөө.

Туулай жилийн барилдаанд хүчит 256 бөх барилдсан юм. Энэ жилийн барилдаанд аварга, арслан, заанууд эхний даваануудад өвдөг шороодож, аймаг, цэргийн цолтнууд хүчтэй барилдан үзэгч олныг шуугиулж байлаа.

Тухайлбал, сар шинийн бөхөд түрүүлэх магадлалтай бөхчүүдийн тоонд ороод байсан улсын гарьд И.Доржсамбуу, аймгийн начин Ц.Чимэддоржид, улсын гарьд Н.Ганбаатар аймгийн начин Н.Батсуурьт хоёрын даваанд өвдөг шороодсон юм.

Харин дөрвийн даваанд:
-Даян аварга Г.Өсөхбаяр аймгийн начин Н.Батсуурьт,
-Улсын арслан Б.Ганбат аймгийн арслан Л.Цэрэнтогтоход,
-Улсын заан М.Баяржавхлан аймгийн арслан Ж.Чулуунбатад,
-Улсын заан Б.Сайнбаяр аймгийн заан Б.Амарзаяад,
-Улсын заан Д.Амгаланбаатар аймгийн арслан А.Алтанхуягт,
-Улсын заан М.Өсөхбаяр аймгийн арслан Б.Сангисүрэнд,
-Улсын харцага Д.Баасандорж цэргийн хурц арслан Т.Санжаадамбад,
-Улсын харцага Л.Пүрэвжав аймгийн арслан Ш.Мөнгөнбаатарт өвдөг шороодсоноор тавын даваанд улсын цолтой, аймгийн цолтой тус бүр найман бөх шалгарч үлдсэн юм.



Ингэснээр шөвгийн дөрөвт Хөвсгөл аймгийн Шинэ-Идэр сумын харьяат, ШШГЕГ-ын “Сүлд” спорт хорооны бөх, улсын арслан Х.Мөнхбаатар, Дорноговь аймгийн харьяат, улсын начин А.Цацавшир, Сүхбаатар аймгийн Онгон сумын харьяат, “Алдар” спорт хорооны бөх, аймгийн хурц арслан Ш.Мөнгөнбаатар, Баянхонгор аймгийн Бууцагаан сумын харьяат, ШШГЕГ-ын “Сүлд” спорт хороо, “Нар Мон” компанийн бөх, аймгийн арслан Ж.Чулуунбат нар шалгарч үлдсэн юм.



Ингэж аймгийн хурц арслан Ш.Мөнгөнбаатар түрүүлж, улсын арслан Х.Мөнхбаатар үзүүрлэсэн.



Энэ үеэр Даян аварга А.Сүхбатын сар шинийн барилдаанд амжилттай барилдсан бөхчүүдэд олгодог “Ирээдүйн аварга” шагналынхаа эзнээр Увс аймгийн Ховд сумын харъяат, аймгийн начин Н.Батсуурийг тодруулсан бол УИХ-ын гишүүн Л.Гүндалай өөрийн санаачилсан “Улсын цолонд ойрхон бөх”-ийн шагналыг өчигдрийн барилдааны түрүү бөх, аймгийн хурц арслан Ш.Мөнгөнбаатарт гардуулсан юм.



БАРИЛДААНЫ ДҮЙЗ

Тавын даваа:
До.Ганхуяг /у.ар/– Ц.Мягмарсүрэн /у.з/
Х.Мөнхбаатар /у.ар/ - А.Алтанхуяг /а.а/
Д.Рагчаа /у.з/ - Э.Энхбат /у.н/
Ө.Бат-Орших /у.х/ - Б.Амарзаяа /а.з/
Т.Өсөх-Ирээдүй /у.н/– Ш.Мөнгөнбаатар /а.а/
А.Цацавшир /у.н/ – Л.Цэрэнтогтох /а.а/
Ч.Санжаадамба /ц.а/ - Н.Батсуурь /а.н/
Б.Сангисүрэн /а.а/ – Ж.Чулуунбат /а.а/

Зургаагийн даваа:
Х.Мөнхбаатар /у.ар/ - Ц.Мягмарсүрэн /у.з/
Ө.Бат-Орших /у.х/ - Ш.Мөнгөнбаатар /а.а/
А.Цацавшир /у.н/ - Э.Энхбат /у.н/
Ч.Санжаадамба /ц.а/ - Ж.Чулуунбат /а.а/

Долоогийн даваа:
Х.Мөнхбаатар /у.ар/ - А.Цацавшир /у.н/
Ш.Мөнгөнбаатар /а.а/ - Ж.Чулуунбат /а.а/

Наймын даваа:
Х.Мөнхбаатар /у.ар/ - Ш.Мөнгөнбаатар /а.а/

Ч.Хүслэн