Монгол дахь Америкийн Худалдааны Танхим /“Ам Чам Монгол”/-аас “Хиймэл оюун ухааны давалгаанд бэлдэх нь” сэдэвт хэлэлцүүлгийг зохион байгууллаа.

Дэлхий даяар хиймэл оюун ухааны хөгжүүлэлтийг бизнесийн төдийгүй олон салбарт ашиглаж эхэлсэн энэ цагт Монгол Улс хэрхэн оновчтой төлөвлөх, үр дүнтэй ажлуудыг зохион байгуулж, эдийн засаг ба хөгжлийг эх орондоо авчрах талаар салбар, салбарын төлөөллүүд хэлэлцэв.

Хэлэлцүүлгийн үеэр “Эй-Айя Академи Азиа”-ийн гүйцэтгэх захирал Б.Болор-Эрдэнэ “Юун түрүүнд бид хиймэл оюун ухааны салбараар дэлхийд тэргүүлнэ гэх мэт худлаа, хий хоосон том зүйл ярихгүй байх хэрэгтэй. Өнөөдөр Монголд бодитоор хиймэл оюун ухааны салбарт ажиллаж буй 10 залуу байна. Гаднын компанид ажилладагтай нийлээд 22.
Одоогоор юу ч чадахгүй, суурь боловсрол байхгүй байж хэтэрхий том амбицлаж болохгүй. Монголчуудыг ажиглахад боловсрол болон ур чадварын шатыг их алгасдаг. Үнэтэй программ худалдаад авчихвал болно, сураад хийж чаддаг болно гэж ойлгодог.

Гэтэл жишээ нь Microsoft Office нь маш олон зүйл хийх боломжтой программ хангамж ч монголчууд үүнийг 5-8 хувьтай л ашигладаг.

АНУ-д оффисын ажилтны нэг өдөр хийдэг ажлыг Монголд 10 өдөр хийж байна.

Хиймэл оюун ухааны веб, ChatGPT зэргээс хэдэн асуулт асууж байгаагаа хиймэл оюун ухаан ашиглаж байна гэж ойлгож болохгүй. Бид зөв цэгээс эхлэх хэрэгтэй.

Энэ сэдвээр олон хурал, зөвлөгөөн зохион байгуулдаг. Хий хоосон яриад өнгөрдөг алдаагаа бүү давтаасай гэж хүсэж байна. Би төрд байсан хүний хувьд тэнд ажил яаж явагддагийг сайн мэднэ.
Монголд гадаа гараад л түгжирнэ. Нийгмийн маш олон асуудалтай ийм улсад хувь хүний хувьд бүтээмжтэй байхад тун хэцүү. АНУ-д оффисын ажилтны нэг өдөр хийдэг ажлыг Монголд 10 өдөр хийж байна.

Тэгэхээр хиймэл оюун ухааныг хувь хүний бүтээмжийг нэмэгдүүлэх, аливаа байгууллага зардлаа бууруулах байдлаар орлого, бүтээмжээ нэмэгдүүлэх боломж гэж хараасай гэж хүсэж байна” гэсэн юм.

ОНДО ХХК-ийн гүйцэтгэх захирал Б.Мандуул “Хиймэл оюун ухааныг нэн тэргүүнд эзэмших ёстой ур чадваруудын нэг гэж үзэн суралцах ёстой гэж хардаг. Бидэнд хөгжиж буй орны давуу тал гэж байна. Хөгжсөн, бидний урд буй улсуудын бодлого, туршлагаас суралцаж, алдааг нь давтахгүйгээр араас нь очно. Мэдээж гүйцэж, урд нь гарч чадахгүй.
Энэ технологийн нэг давуу тал нь хурдан дасан зохицох боломжтой. Бид дотооддоо л өрсөлдөхийн төлөө яваад байдаг. Энэ бодлогын алдаагаа арай өөрөөр шийдэж, олон улсын түвшинд өрсөлдөх хэрэгтэй” гэв.

“АмЧам Монгол”-ын Гүйцэтгэх захирал О.Адъяа энэ удаагийн хэлэлцүүлгээр хиймэл оюун ухааны хөгжил сэдвээр ярилцаж, эрх зүйн зохицуулалт ямар түвшинд байна, үндэсний болон олон улсын компаниуд туршлага, мэдлэгээсээ хуваалцах боломжийг бүрдүүлэх зорилготойг онцолсон.
Тус танхим цахим эдийн засгийн шилжилтийн хороо буюу ажлын хэсэгтэй бөгөөд энэ чиглэлийн компаниуд хороонд нэгдэж, цахим шилжилт, хиймэл оюун ухааны хөгжил зэрэг сэдвээр хэлэлцэж, хамтран ажилладаг.

Гэрэл зургуудыг Т.Бархас