Энэ жил Монголын кино институт, Lotus Pictures хамтран 12 дахь удаагийн Алтан Өргөө олон улсын кино наадмыг Соёлын яам, Кино урлагийн зөвлөлийн Кино урлагийг дэмжих сангийн болон "Туургатан" медиа групп, Мета медиа платформын санхүүжилтээр 2024 оны тавдугаар сарын 8-12-нд амжилттай зохион байгуулагдлаа.

Наадмын турш  Тэнгис, Prime Cineplex Zaisan, Gegeenten, CinemaNext гэсэн театруудад  олон улсын бүрэн хэмжээний

• 8 тусгай үзвэр,
• 2 сургалт,
• 1 илтгэл хэлэлцүүлэг,
• 5 богино хэмжээний цоморлог үзвэрийг бэлтгэж үзэгчдэд хүргэснээс гадна Хөдөлмөрийн баатар, Ардын жүжигчин Г.Жигжидсүрэн гуайн 4 киног Ретроспектив хөтөлбөртөө толилууллаа.

Наадмын хүрээнд 60 орны 422 богино кино хүлээн авснаас 14 кино нь олон улсын уралдаант хэсэгт, 10 Монгол уралдаант хэсэгт шалгарсан билээ.

Наадмын Монгол уралдаант хэсгийн шүүгчдийн бүрэлдэхүүнд кино найруулагч П.Золжаргал, сэтгэл судлаач Д.Лхамсүрэн, кино эдийн засагч, Монголын кино урлагийн зөвлөлийн гишүүн Г.Энхбаяр нар багтжээ. Олон улсын уралдаант хэсгийн шүүгчдээр Швейцарын кино куратор Дельфин Жаннере, кино шүүмжлэгч Б.Амарсанаа, Алтан Өргөө 2020 оны ялагч залуу кино найруулагч Ц.Галсандорж нар ажиллав.

Шүүгчдийн шийдвэрээр дараах шагналтнууд тодорч 5 сарын 12-ний өдөр шагнал гардуулах үйл ажиллагаа ёслол төгөлдөр явагдсан билээ.

АЛТАН ӨРГӨӨ ДЭЭД ШАГНАЛ
Өглөө болно
С.Ихбаяр

DIGICON6 MONGOLIA GOLD
Хайрцаг
Г.Барсболд, Э.Дөлгөөнмөрөн, Б.Болоржин

ШИЛДЭГ МОНГОЛ ЭКСПЕРИМЕНТАЛЬ КИНО
Маргааш сэрэхгүй байцгаая
Г.Ганлхагва

MAILUKI FILMS ОЛОН УЛСЫН КИНО ТҮГЭЭЛТИЙН ЭРХ
Хэзээ цас орох вэ?
Г.Баттулга

ШИЛДЭГ ОЛОН УЛСЫН ХҮҮРНЭЛТ КИНО
Жаффагийн жүрж (Палестин)
Мохаммед Алмуганни

ШИЛДЭГ ОЛОН УЛСЫН ХҮҮХЭЛДЭЙН КИНО
Алдагдсан захидлууд (Нидерланд)
Кыхынгы Оюуур

ШИЛДЭГ ОЛОН УЛСЫН БАРИМТАТ КИНО
Чернобыль 22 (Украин)
Алексей Радинский

ШИЛДЭГ ОЛОН УЛСЫН ЭКСПЕРИМЕНТАЛЬ КИНО
Унахуй (Унгар)
Анна Гыймеши