Дэлхийн Эрүүл Мэндийн Байгууллагын гишүүн орнууд 1987 онд тамхинаас үүдэлтэй урьдчилан сэргийлэх боломжтой нас баралт, өвчинд дэлхий нийтийн анхаарлыг хандуулах зорилгоор “Тамхигүй өдөр”-ийг санаачилжээ. 1987 онд Дэлхийн Эрүүл Мэндийн Ассамблей 1988 оны 4-р сарын 7-ны өдрийг "Дэлхийн тамхигүй өдөр" болгохыг уриалсан WHA40.38 тогтоолыг баталжээ. 1988 онд WHA42.19 тогтоолыг баталж, жил бүрийн тавдугаар сарын 31-ний өдрийг “Дэлхийн тамхигүй өдөр” болгон тэмдэглэж эхэлсэн.

Энэ өдөр дэлхий нийтээр тамхины хор хөнөөл, тамхины компаниудын бизнесийн үйл ажиллагаа, тамхинаас үүдэлтэй өвчинтэй тэмцэхийн тулд ДЭМБ юу хийж байгаа, дэлхийн өнцөг булан бүрд байгаа хүмүүс эрүүл мэнд, эрүүл амьдрах эрхээ эдлэх, хамгаалахын тулд юу хийж болох талаар олон нийтэд мэдээлдэг.

Энэ жил "Тамхины үйлдвэрлэлийн хөндлөнгийн оролцооноос хүүхэд, өсвөр үеийнхнийг хамгаалцгаая" уриатайгаар тэмдэглэж байна.

НҮБ-аас дэлхий даяарх залуучуудыг тамхины маркетингаас хамгаалахыг засгийн газруудад уриалжээ. Тамхины компаниудын ашиг олох зорилготой сурталчилгаа нь донтолтын шинэ давлагааг бий болгож буй бөгөөд бүх бүс нутагт хүүхдүүд насанд хүрэгчдээс ч илүүтэй цахим тамхи хэрэглэж байгааг онцолжээ. Мөн дэлхийн хэмжээнд 13-15 насны 37 сая залуучууд тамхи хэрэглэж байгааг мэдээлсэн байна.

ДЭМБ-аас гаргасан тамхины талаарх онцлох баримтууд:

• Тамхи хэрэглэгчдийнхээ талыг устгадаг
• Тамхи жил бүр 8 сая хүний аминд хүрдэг. Түүний 7 сая гаруй нь тамхины шууд хэрэглээнээс үүдсэн бол 1.2 сая хүн нь дам тамхидалтаас үүджээ.
• Дэлхий даяар 1.3 тэрбум хүн тамхи татдагаас 80 хувь нь бага дунд орлоготой.
• 2020 оны байдлаар дэлхийн хүн амын 22.3 хувь нь, нийт эрэгтэйчүүдийн 36.7 хувь нь, эмэгтэйчүүдийн 7.8 хувь нь тамхи татдаг гэсэн судалгаа гарчээ.
• ДЭМБ-ын гишүүн орнууд 2003 онд тамхины хяналтын суурь конвенцыг баталсан бөгөөд одоогоор 182 орон нэгдэн орсон. Түүний нэг нь Монгол улс.
• Тамхи үйлдвэрлэхэд жилд 600 сая мод тайрч, 2000 км.кв талбайг устгаж, 22 тэрбум тонн ус зарцуулж, 84 сая тонн нүүрсхүчлийн хий ялгаруулдаг.