ЗГХЭГ-ын дарга Н.Учрал цаг үеийн асуудлаар сэтгүүлчдэд мэдээлэл өгөв.

Тэрбээр “Засгийн газрын үйл ажиллагаа, төрийн ажлыг тасралтгүй явуулах зарчмыг барин ажиллаж байна. Би хоёр өдрийн өмнө Франц, Монголын Засгийн газар хоорондын комиссын хурлыг хийж, энэ үеэрээ олон улсын шинжилгээний лаборатори байгуулах асуудлыг шийдвэрлүүллээ. Мөн дипломат харилцаа тогтоосны 60 жилийн ойд оролцоод ирсэн. Мэдээж өчигдөр МАН-ын бага хуралдаа суусан. Бага хурлаас улстөрийн шийдвэр гарсан. Надад ийм л мэдээлэл байна. 

Манай нам системтэй, бие даасан институц. Гаргасан шийдвэрээ дагаад л ажиллана. Олонхын шийдвэрт би дүгнэлт хийх зохимжгүй. Би Л.Оюун-Эрдэнийн Засгийн газрын “гал тогоо”-г хариуцаж байгаа хүн. Тиймээс  болоод байгаа үйл явдалд хувь хүний зүгээс дүгнэлт хийх нь ёсзүйн хувьд зохимжгүй.

Ерөнхий сайд Л.Оюун-Эрдэнэ ажлаа хийж байна, төрийн ажил тасралтгүй үргэлжилж байгаа. Одоогоор алба, ажлын яриа хэлцэл юу ч байхгүй" гэв.