Монгол Улсын Ерөнхий сайд Л.Оюун-Эрдэнэ Засгийн газрын бүтцийн тухай болон Засгийн газрын бүрэлдэхүүний тухай хуулийн төслийг өргөн мэдүүлсэн. Энэ хуулийн төслийг Төрийн байгуулалтын байнгын хорооны хурлаар хэлэлцэж байна.  

Хуулийн төслийн үзэл баримтлалтай холбоотойгоор байнгын хорооны гишүүдийн асуултад Ерөнхий сайд Л.Оюун-Эрдэнэ хариулт өгч байна. 

ХҮН намын дарга Т.Доржханд, Засгийн газрын бүрэлдэхүүн дээр яамдын тоог нэмэгдэхгүй байх бодлого барьж, хуулийн төсөлд оруулсан нь зөв. Цаашдаа төрийн алба цомхон, чадварлаг байх ёстой гэсэн зарчим барьж ажиллахыг дэмжиж байна.

ИЗНН-ын дарга Б.Батбаатар, ИЗНН Засгийн газрын бүрэлдэхүүнд ажиллахгүй, сөрөг хүчний байр суурийг баримталж ажиллана гэсэн тогтоолыг зургаадугаар сарын 19-нд гаргасан. АН-ын бүлэг Засгийн газарт хамтарч байгаагаараа сөрөг хүчин, цөөнх гэсэн статусаасаа татгалзах хэрэгтэй. Энэ бол улс төрийн асуудал.

УИХ-ын гишүүн С.Зулпхар, Гэр бүлийн тухай хууль байгуулж байгаа нь чухал. Дөрвөн жил ХНХЯ-д ажиллаж байсны хувьд Хөдөлмөр гэсэн нэрийг оруулах нь олон улсын харилцаанд ороход, хоорондоо ойлголцоход чухал байдаг.

Олон улсын хөдөлмөрийн байгууллага гэж бий. Хөдөлмөр, нийгмийн түншлэлийн гурван талт хэлэлцээр гэх мэт хөдөлмөр эрхлэлттэй холбоотой асуудлуудыг шийдвэрлэхэд нэршлийн хувьд “Хөдөлмөр” гэдэг үг орвол зүйтэй байна гэсэн санал хэлэв. Төсөлд ХНХЯ-ны нэршлийг Гэр бүл, хүний хөгжлийн яам нэрээр тусгаад буй юм. 



Төсөлд ХНХЯ-ны нэршлийг Гэр бүл, хүний хөгжлийн яам нэрээр тусгасныг хэд хэдэн гишүүн “хөдөлмөр” гэсэн нэрийг оруулах нь зүйтэй талаар саналаа хэлэв.

УИХ-ын гишүүн Э.Болормаа, Засгийн газрын бүтцийг томсгоогүйд нь талархаж байна. УИХ-ын гишүүн О.Номинчимэг Хуулийн төсөлд  Шударга ёс, хууль зүй дотоод хэргийн яам гэж нэрлэснийг “шударга ёс” гэсэн үгийг яамны нэрнээс авах санал илэрхийлсэн.

Ерөнхий сайд Л.Оюун-Эрдэнэ, Хуулийн төслийг Засгийн газар өөрийн үзэл баримтлалын дагуу оруулж ирж байгаа. Ямар өөрчлөлт оруулах нь гишүүдийн бүрэн эрхийн асуудал. Үүн дээр ЗГХЭГ болон мэргэжлийн бусад байгууллагууд ажилласан. Нэршлийн хувьд “Хөдөлмөр” гэсэн үгийг оруулж болох байх, гэхдээ урт нэртэй л болох байх. Гол агуулга бол нэршлээсээ болж яаман дотор чиг үүргүүд болон хүний хөгжил, гэр, нийгмийн хамгаалал гэх мэтээр цогцоор ажиллах боломжоо битгий алдаасай.

ХЗДХЯ хуучин нэрээр үлдэж болно. Х.Тэмүүжин, О.Номинчимэг гишүүд хэлж байгаа буруу биш. Гэхдээ шүүх, прокурор нь чухам ямар чиг үүрэгтэйг олон нийтэд ойлгуулахгүй бол энэ дунд маш их будлиан гардаг.

Жишээ нь, шүүхтэй холбоотой нэг асуудал парламентаар хэлэлцэх болоход нийгэмд заавал нэг сенсаац тарьдаг. Би үүнийг сайн мэдэрдэг болоод байна. Аргыг нь ойлгодог болоод байна. Тэгээд л бужигнаан болно, бужигнаж байх хооронд гишүүдийг лообийддог. Үр дагавар нь хэдэн хүн “Авлигын эсрэг шүүх бол буруу юм” гэж хэлээд тэр асуудлыг унагаадаг, улмаар мартчихдаг. Ийм асуудлууд их гардаг шүү.

Шүүх дотор Батдэлгэр гэж нөхрөөс авхуулаад олон хүмүүс ийм будлиан тарьдаг. Шүүгч нар Төрийн ордонд, гишүүдийн арын өрөөнд байж байдгаа болимоор байна. Шүүх засаглал шүүх засаглалаараа л баймаар байна. Би шүүхэд шүүмжлэлтэй ханддаг. Би Ерөнхий сайдаар томилогдсоноос хойш хэн нэг шүүгчтэй тусгайлан нэг ч удаа уулзаагүй. Энэ бол эрх мэдлийн тусдаа ойлголт юм шүү. Тийм учраас энэ идеологийг хадгалахын тулд “Шударга ёс” гэдэг үгийг оруулж ирэх нь зүйтэй гэж үзсэн юм. Шүүх ч гэсэн шударга ёсны ордонтой болох хэрэгтэй.

Дээр нь, Засгийн газар бүрдсэнээс хойш 30 хоногийн дотор Засгийн газрын үйл ажиллагааны төлөвлөгөөг боловсруулах ёстой. Төлөвлөгөөг хамтарч ажиллаж байгаа Засгийн газартай Герман, Шинэ Зеландын парламентын засаглалтай, хувь тэнцүүлсэн тогтолцоогоор сонгуулиа явуулдаг улс орнуудын нийтлэг жишгийг барьж боловсруулна. Энэ гэрээ хийгдсэнээр тухайн гэрээнд тусгагдсан асуудлаа барьж, үүрэг хүлээж ажиллана. Гэрээ байгуулах ажилд намууд төлөөллөө оруулж, асуудалд нухацтай хандаж, улс орны тулгамдсан асуудлыг шийдвэрлэхэд чухал ач холбогдолтой гэж үзэж байна гэлээ. 

Гишүүд асуултад хариулт авч, саналаа хэлсний дараа  Засгийн газрын бүтцийн тухай болон Засгийн газрын бүрэлдэхүүний тухай хуулийн төсөл болон хамт өргөн мэдүүлсэн хуулийн төслүүдийг хуралдаанд оролцсон гишүүдийн олонх дэмжсэнээр уг хуулийн төслийг чуулганы нэгдсэн хуралдаанд танилцуулахаар шийдвэрлэв.