Цэцэрлэгийн хүүхдийн хоолны түүхий эдийн зардлын төсвийг өдөрт 1000 төгрөгөөр нэмэгдүүлэх, нэмэгдлийг эцэг, эхчүүдээс гаргуулах шийдвэр гарч, энэ хичээлийн шинэ жилээс эхлэн хэрэгжиж буй юм. 

Боловсролын сайд П.Наранбаяр, Энэ жил цэцэрлэгт 292 мянга гаруй хүүхэд суралцана. Бид өмнөх жилүүдийн адил энэ жил ч гэсэн хүсэлт гаргасан хүүхэд бүрийг цэцэрлэгт хамруулна.

Хүүхдийнхээ хоолыг эцэг эх, асран хамгаалагч нь хамтран төлдөг болох зохицуулалт Боловсролын ерөнхий хуульд орсон. Цэцэрлэгийн хүүхдийнхээ хоолны зардалд зориулан эцэг эх, асран хамгаалагч нь хоногт 1000 төгрөг нэмж төлдөг болсноор хүүхэд илүү шим тэжээлтэй хооллох боломжтой болно. Хүүхдүүд цэцэрлэгтээ цадталаа идэж, ханатлаа тоглох ёстой гээд эцэг, эхчүүдийг хоолны мөнгөнд хувь нэмэр оруулахыг уриалсан. 

Цэцэрлэгийн хүүхдийн хоолны материалын мөнгийг ажлын 22 өдрөөр тооцож, сард 22 мянган төгрөг эцэг, эхчүүдээс авч эхлэхээр шийдвэрлэсэн боловч хичээлийн шинэ жилийн эхний долоо хоногт хоолны мөнгийг авч эхлээгүй байна. 

Энэ талаар Боловсролын яамны Хоол үйлдвэрлэлийн хэлтсийн дарга Түмэнжаргалаас тодруулахад, Цэцэрлэгийн хүүхдийн хоолны мөнгийг ямар байдлаар авах журам, зохицуулалт нь хараахан гараагүй байна. Энэ асуудлыг Засгийн газрын ирэх долоо хоногийн хуралдаанаар оруулж, шийдвэрлүүлээд олон нийтэд мэдээлнэ.  

-Тэгэхээр одоо хүүхдүүдийн хоолыг өмнөх жилийн төсвөөр нь бэлдэж байгаа гэсэн үг үү?
Тийм ээ, цэцэрлэгийн хүүхдийн хоолны мөнгө өдөрт 3000 төгрөг байдаг. Одоогоор энэ төсвөөр хоол бэлтгэж байна. Дунд сургуулийн үдийн хоолны төсөв 1500 төгрөг байна. 

-Дунд сургуулийн үдийн хоолны төсвийг нэмэгдүүлэх үү? 
-Боловсролын яамнаас Үдийн хоолны мөнгийг нэмэгдүүлэх саналаа 2025 оны Улсын төсөвт тусгуулаад байна гэлээ.