УИХ-ын чуулганы үдээс хойших хуралдаан үргэлжилж байна. Ерөнхий сайд Л.Оюун-Эрдэнэ Үндэсний баялгийн сангийн тухай хуулийн хүрээнд иргэн бүрд хуримтлалын данс нээж эрүүл мэнд, боловсрол, орон сууцны зорилгоор зарцуулах ажлын зохион байгуулалт, хэрэгжилтийн талаар мэдээлэл хийв. Мэдээлэлтэй холбогдуулан УИХ-ын гишүүд үг хэлж, асуулт асууж байна.

УИХ-ын гишүүн Д.Цогтбаатар “Засгийн газраас Монгол Улсад агаарын хөлгийн түлш нийлүүлэх тухай Монгол Улсын Засгийн газар болон Оросын Холбооны Улсын Засгийн газар хоорондын хэлэлцээрийн асуудлыг оруулж ирсэн. Онгоцны түлшийг хувийн хэвшил оруулж ирээд өнөөдрийг хүрсэн. Гэтэл төр өөр дээрээ түлш зардаг компани байгуулаад хувийн хэвшилтэй өрсөлдөх юм шиг дүр, зураг харагдаад байна. Хувийн хэвшилдээ үнийн дээд хязгаар тогтоож өгөөд, үүнээс дээш гаргахгүй гээд заачихвал, үүнийг хувийн компани чадна гэвэл төр заавал ийш орох шаардлагагүй. Үүнийг бодож үзээд дахин оруулж ирвэл зүгээр байна.

Мөн хувийн хэвшлээ дэмжинэ гэж 30 жил ярьж 30 жил дарамталсан. Нэг жишээ нь “Ард” кино театр гэх барилгыг төр нь ч хувийн хэвшил нь ч ашиглаж чадахгүй балгас болгож хотын төвдөө нурсан байшинтай нийслэл болсон. Бас Ардчилсан намын нэр дээрх Соёлын төвийн хүзүүвч одоог хүртэл гацчихсан байна. Зөвхөн уул уурхай гэхгүйгээр бусад хувийн хэвшилдээ анхаарч, дэмжиж, нээлттэй бодлого барих шаардлагатай гэдэг санал хэлье” гэв.