Хөдөлмөрийн хөлсний доод хэмжээ энэ сарын 01-нээс 240.000 боллоо. Үүнтэй холбогдуулан өнгөрсөн онд сайн дурын даатгалд даатгуулсан иргэд энэ сарын 01-нээс “Шинэчилсэн гэрээ”-нд хамрагдана. Иргэд, даатгуулагчид харьяа дүүргийнхээ Эрүүл мэнд, нийгмийн даатгалын хэлтэст хандаж, гэрээгээ шинэчлэн байгуулах шаардлагатай болж байна.   

Хөдөлмөрийн хөлсний доод хэмжээ 192,000 төгрөг байхад сайн дурын даатгалд 23040 төгрөг төлсөн даатгуулагчид энэ оноос 28,800 төгрөг төлөх боллоо.

Нийслэлийн хэмжээнд өнгөрсөн онд 94,515 иргэн сайн дурын даатгалд хамрагдсан. Өмнөх онтой харьцуулахад өссөн нь сайн дурын даатгалын ач холбогдол, учирч болох нийгмийн эрсдлээс хамгаалагдах боломжийн талаарх иргэдийн ойлголт мэдлэг дээшилж буйтай холбоотой.

Сайн дурын даатгалд хамрагдсанаар өндөр насны, тахир дутуугийн, тэжээгчээ алдсаны тэтгэвэр, жирэмсний болон амаржсаны, хөдөлмөрийн чадвар түр алдсаны, оршуулгын тэтгэмж, хөдөлмөрийн чадвар сэргээхтэй холбоотой төлбөр, сувиллын хувьсах зардал зэргийг авах боломжтой.

Дашрамд дуулгахад өнгөрсөн онд сайн дурын даатгалын шимтгэлээ Төрийн банкны “Цахим банк”, Хаан банкны “Ухаалаг банк” үйлчилгээг ашиглан ухаалаг гар утас, интернетээр төлөх боломжтой болсон гэж Нийслэлийн эрүүл мэнд, нийгмийн даатгалын газраас мэдээллээ.

САЙН ДУРЫН ДААТГАЛЫН ШИМТГЭЛ ТӨЛӨХ ДҮҮРГҮҮДИЙН ДАНС

Сайн дурын даатгалын гэрээгээ шинэчлэн байгуулахдаа:

1. Иргэний үнэмлэхний хуулбар,
2. 3х4 чээж зураг 1 хувь,
3. Нэг сарын шимтгэлийн доод хэмжээ  240000x12%=28800 төгрөг
4. Хавтасны үнэ 1000 төгрөгийг тушаасан баримтаа тус тус авчирна.