Харилцаа холбооны салбарынхан “Тэрбум мод” Үндэсний хөдөлгөөнийг дэмжин дараах санаачилгыг эхлүүлэв. 

Мод тарьж, ургуулсан иргэнийг датагаар урамшуулна. Иргэд тарьж, ургуулсан модоо E-Mongolia-д аравдугаар сарын 1-ний өдөр хүртэл бүртгүүлнэ.

Технологийн шийдэл, иргэд олон нийтийн оролцоотойгоор  улс орнуудын мод ургуулах санаачилга илүү үр дүнд хүрчээ. Тэд мод тарьсныг баталгаажуулах, ургуулах, хамгаалах ажилд инновацлаг шийдэл, аппликэйшн, цахим талбаруудыг ашигладаг.

Жишээ нь Лос Анжелес хот “Tree map” системээр иргэдийн тарьсан модыг бүртгэж, ургалтыг нь тогтмол хянадаг бол Сингапур уг системтэй ойролцоо “Tree tracker” платформыг ашиглаж байна. Австралийн Мельбурн “Urban Forest Fund”- аас мод ургуулсан, ногоон байгууламжийг нэмэгдүүлсэн бол санхүүгийн урамшуулал үзүүлдэг.

Энэ хандлагыг нийслэлд нэвтрүүлэх, айлуу хашаандаа мод тарьсан бол бүртгүүлж, ургуулсан бол урамшуулал авдаг тогтолцоог УИХ-ын гишүүн, ЦХИХХ-ны сайд асан Ц.Баатархүү өнгөрсөн гуравдугаар сард санаачилж, Ерөнхийлөгчийн тамгын газартай хамтран “Тэрбум мод таны хашаанаас эхэлнэ” цахим бүртгэлийг эхлүүлжээ.

Энэ санаачилгыг харилцаа холбооны салбарынхан буюу Мобиком, Скайтел, Юнител, Жимобайл компаниуд дэмжиж, модоо амжилттай ургуулсан иргэнийг датагаар урамшуулахаар болжээ. 

“Тэрбум мод таны хашаанаас эхэлнэ” санаачилгын хүрээнд  иргэдийн тарьсан модны ургалтыг дрон ашиглаж, тогтмол ажиглана. Иргэдэд ногоон оноо буюу карбон кредит өгөх шийдлүүдийг нэвтрүүлэхээр бэлтгэж байна.

Та хашаандаа тарьж, ургуулсан модоо “e-mongolia” гар утасны аппликейшнээр 10 дугаар сарын 1 хүртэл бүртгүүлэх юм.

Мод тарьж, амжилттай ургуулснаар нийслэлийн  нэг хүнд оногдох ногоон байгууламж нэмэгдэж, агаар, хөрс, дуу чимээ болон үнэрийн бохирдол буурах боломжтой.