Эмэгтэйчүүдийн сагсан бөмбөгийн шигшээ тоглолтод тоглох багууд тодорлоо. Эд бол Америк болон Испанийн багууд.

Америкчуудын хувьд эрчүүдийнхээ нэгэн адил зөвхөн түрүүлэх зорилготой. Тэд хагас шигшээ тоглолтод Францын багтай хүч үзсэн.

Францчууд уг нь эхний хоёр үе эн тэнцүү үзсэн ч гуравдугаар үе тэднийх биш байлаа. Энэ үед Америк 17 оноо илүү авснаар тэд хожих өндөр боломжтой болсон. Дөрөвдүгээр үед энэ зөрүүгээ бараг хадгалсаар 86-67-оор хожив. 18 оноо авсан Таураси багийн гол хөдөлгүүр нь байлаа.

Нөгөө тоглолт Испани болон Сербийн хооронд болсон. Испаничууд энэ тэмцээнд Америкийг хожиж аваргалах чин хүсэлтэй ирсэн баг.

Эхнээсээ л тэд илүүрхэж тоглоод эхний үеийг 11 оноогоор хожиж өндөрлөсөн. 2-р үед тэд 6 оноо дутуу авсан ч 3-р үед 10 оноогоор илүүрхсэн нь тэдний хожих нөхцөлийг бүрдүүлж өгсөн.

4-р үед онооны зөрүүгээ хадгалсаар испаничууд шигшээ тоглолтод шалгарч чадсан. Тэд багаараа тун жигдхэн тоглосон. Энэ формоо хадгалж чадвал финалд тэд тийм ч амархан хожигдоод өгчихгүй байх. Хэсгийн тоглолтод тэднийг америкчууд “шүүрдчихээд” байгаа.

Эрэгтэй хагас шигшээ манай цагаар шөнийн 3.30-аас Америк Испанийн тоглолтоор эхлэх бол өглөөний 7.00 цагт Австрали болон Серби улсууд хоорондоо тулна.