Эрдмийн баяр есдүгээр сарын нэгэн. Хүүхэд бүхэн ангийнхаа андуудтай уулзахаар, багшдаа цэцэг барин баярлуулахаар, будаг ханхалсан сургуулийнхаа босгыг алхан орохоор энэ өдөр догдлоно.

Сургуулийн босгоор анх алхан орж буй бяцхан үрсээ хөтлөн алхах аав, ээжүүдийн сэтгэл ч догдлох нь дамжиггүй. Энэ л сайхан өдрийн дараачаас амьдрал жигд хэмнэлдээ орж, хавар хүртэл үргэлжилнэ. Эцэг, эх бүр хүүхдээ онц сургахыг, сайн сургуульд сургахыг хүсэх нь мэдээж. Хожмын өдөр сайн сайхан амьдраасай гэсэндээ өнөөдөр ийнхүү сэтгэлээ чилээх нь ч зөв.

Сүүлийн жилүүдэд хүүхдүүддээ “хэт анхаарал” тавьсан гэр бүлийнхэн, сургуулийн багш удирдлагууд хүүхдүүдийг мэдрэлийн ядаргаанд ортол нь хичээлээр “нүдэх” болсон. Гэтэл хүүхэд гэдэг ирээдүйн сайн сайхныхаа төлөө хичээн суралцах нь зөв ч тоглож, наадах, амарч зугаацах цаг зайлшгүй шаардлагатай нас билээ.

Хүүхэд чинь заавал гүн ухаантан, математикч, одон оронч болох албагүй. Тэр сайн хүн, сайн эцэг, эх болж хүмүүжих учиртай гэдгийг та битгий мартаарай. Тиймээс хүүхдээ хичээлдээ шамдахыг сургахын зэрэгцээ, түүнийг шахамдуулахгүй байхыг хичээгээрэй.
Хүүхэд чинь муу дүн авсан ч таны эрдэнэ болсон үр удам хэвээрээ л байна шүү дээ. Хүүхдээ шийтгэж биш, хайрлаж, тэднийг сонсож, хүндэтгэж өсгөвөл таны хүлээж байснаас ч илүү үр дүн гарч болох юм.

Хичээлийн шинэ жилийн эхний өдөр сургууль гэдэг ямар гайхамшигтай өргөө болох, сурна гэдэг ямар сайхан үр жимсийг хүний амьдралд бэлэглэж болох талаар хүүхдүүддээ ойлгомжтой энгийнээр тайлбарлаж өгөөрэй.

Хичээлийн шинэ жилийг нийт эцэг эх, багш сурган хүмүүжүүлэгчид болон оюутан сурагчиддаа хүргэж байна.