Хүн төрөлхтний эв нэгдлийн бэлгэ тэмдэг болсон "Рио 2016" зуны ХХХI олимпийн наадамд зориулсан Монголын үндэсний олимпийн хороо, “Монгол шуудан” ХХК хамтран шуудангийн шинэ марк гаргалаа.

"Зуны XXXI олимп" сэдэвт маркийн анхны өдөр буюу шинэ маркийг худалдаанд гаргах нээлтийн ёслолын ажиллагаа өнөөдөр МҮОХ-ны байранд боллоо. Ёслолын ажиллагаанд “Монгол шуудан” ХХК-ийн тэргүүн дэд захирал А.Шарав, Монголын үндэсний олимпийн хорооны Ерөнхийлөгч Д.Загдсүрэн, мөн тус хорооны дэд Ерөнхийлөгч, Рио-2016 Монголын багийн ахлагч Ж.Хатанбаатар болон тамирчид, марк цуглуулагчид оролцлоо.

Олон улсын олимпийн хорооноос марк бүтээх тусгай зөвшөөрлийг Монгол шуудан компанид өгсний дагуу нэг нэрийн марк гаргажээ. Марк дээр Бразил улсын далбаа, Рио-де-Жанейро хот, Аврагч Христийн хөшөө, Олимпийн алтан медаль, Олимпийн таван цагираг зэргийг дүрсэлсэн байна. Мөн хэлхээний чимэглэлд спортын зарим төрлүүдийг дүрсэлжээ. 

"Монголчууд анх 1964 онд олимпийн наадамд оролцож байсан. Энэ цагаас хойш Монгол шуудан компанийн зүгээс олимпийн наадамд зориулсан марк гаргадаг болсон. Ийнхүү марк гаргаснаар олимпийн хөдөлгөөнийг дэмжих, тамирчдаа алдаршуулах, улс орныхоо нэрийг олон улсын тавцанд гаргах чухал ач холбогдолтой" гэж Монголын үндэсний олимпийн хорооны дэд Ерөнхийлөгч, Рио-2016 Монголын багийн ахлагч Ж.Хатанбаатар хэллээ.

"Монгол шуудан"  ХХК хамгийн анх 1964 оны олимпийн наадамд зориулж марк урлаж байсан. Үүнээс хойш зуны 14 олимпийн наадмын маркийг тус байгууллагаас урлан бүтээлээ. Маркийн зургийг Монгол шуудан компанийн зураач Ч.Бат-Эрдэнэ зурж, дизайнерээр Б.Дамдинбазар ажиллажээ.

"Риогийн олимпийн маркийг урлан бүтээх ажлыг хоёр жилийн өмнөөс эхэлсэн. Судалгааны ажил хийж, зургийг нь хоёр сарын хугацаанд зурсан. Миний хувьд өмнө нь Лондонгийн олимпийн маркийг бүтээж байсан туршлагатай. Лондонгийн олимпийн маркад Монголын спортын топ төрлүүдийг дүрсэлсэн. Харин энэ удаагийн зуны олимпийн маркад Бразил улсын соёл, онцлогийг оруулж өгснөөс гадна манай үндэсний онцлогийг шингээсэн. Тухайлбал соёмбо, уйгуржин монгол бичгийг оруулж өгсөн" гэж маркийн зураач Ч.Бат-Эрдэнэ хэллээ.

"Зуны XXXI олимп" сэдэвт марк 10 мянган ширхэг хэвлэгдэн гарсан бөгөөд 1000 төгрөгийн үнэтэй юм байна. Маркийн анхны өдөр буюу шинэ маркийг худалдаанд гаргах ажиллагаанд маш олон марк цуглуулагчид хүрэлцэн иржээ.

Энэ үеэр "Зуны XXXI олимп" маркийн хамгийн анхны худалдан авагч болсон "Би 10 настайгаасаа эхлэн марк цуглуулж байгаа. Ихэвчлэн монгол марк цуглуулдаг. 1964 оны Токиогийн олимпоос хойш бүх маркийг цуглуулахаар эрэл хайгуул хийж байна" хэмээн О.Батсайхан хэлэв.

Тус шуудангийн марк нь захидлын дугтуй болон ил захидалд наан дэлхийн өнцөг булан бүрт түгэхээс гадна марк сонирхогчдын цуглуулгыг баяжуулна.