УИХ-аас суудлын автомашины онцгой албан татварыг өнгөрсөн тавдугаар сарын 1-нээс нэмсэн ч тодорхой хугацааны дараа шийдвэрээ хүчингүй болгосон юм. Ингэснээр нэмсэн хугацааны татварыг иргэдэд буцаан өгөхөөр болсон. Энэ талаар ГЕГ-ын Татвар орлогын газрын байцаагч М.Баттуяагаас тодрууллаа.

- Автомашины татвараа буцаан авах иргэд хэр их хандаж байна вэ?
-Одоогоор 27 аж ахуйн нэгж байгууллага 249 иргэд манайд буцаан олголт авах хүсэлт ирүүлсэн. Манай байгууллага 466 автомашины буцаан олголтыг шалгаад, Сангийн яам руу хүргүүлж буцаан олголт өгсөн. Одоо 204 орчим хүсэлт ирээгүй байна. Татварыг хүчингүй болгох тогтоолоос өмнө гаалийн байгууллагаар 670 орчим автомашин бүрдүүлэлт хийгдэж онцгой албан татвараа төлсөн.

-Буцаан олголт авахын тулд ямар баримт бүрдүүлж өгөх вэ?
-Манай байгууллагад албан хүсэлт гаргана. Автомашиныг импортоор оруулж ирсэн гаалийн мэдүүлгийн хуулбар, юм уу худалдаж авсан бол тээврийн хэрэгслийн гэрчилгээ, хуулбар, худалдах, худалдан авах гэрээг нотариатаар баталгаажуулсан баримт өгнө. Мөн иргэний цахим үнэмлэхний хуулбар, аж ахуйн нэгж байгууллагууд улсын бүртгэлийн гэрчилгээний хуулбар авчирна. Банкны данс, утасны дугаараа тодорхой бичнэ.

-Хүсэлтийг хэд хоногт шийдвэрлэх вэ?
-Манайхаас бүрдүүлэлт очсон тохиолдолд Сангийн яам бүртгэгдсэн данс руу шилжүүлэг хийнэ. Буцаан олголтыг энэ ондоо багтаан хэрэгжүүлэх журамтай.