Одоогоос яг нэг жилийн өмнө УМБГ шинэ бүтэц зохион байгуулалтад орж, Байгаль хамгаалах журмын эсрэг гэмт хэрэг мөрдөх хэлтэс, Онц хүнд, зохион байгуулалттай гэмт хэрэг мөрдөх хэлтэстээ Хар тамхи, мансууруулах бодистой холбоотой хэрэг мөрдөх, Хүн худалдаалах гэмт хэрэг мөрдөх тасаг байгуулсан билээ. Тэгвэл өнгөрсөн баасан гаригт тус газарт дахин бүтэц, зохион байгуулалтын өөрчлөлт хийж, найман хэлтэстэй болжээ.

Тус газрын I хэлтэс буюу Дотоод, хяналт шалгалтын хэлтсийн даргаар тус газрын Хүнд гэмт хэрэг мөрдөх хэлтсийн дарга, хурандаа Д.Цогтбаярыг томилов.

I хэлтсийн дарга асан, хурандаа Б.Цоодолыг Байгаль хамгаалах журмын эсрэг гэмт хэрэг мөрдөх хэлтсийн дарга болгожээ. УМБГ-ын Онц хүнд, зохион байгуулалттай гэмт хэрэгтэй тэмцэх хэлтсийг Хар тамхи, мансууруулах бодис, хүн худалдаалах, зохион байгуулалттай гэмт хэрэг мөрдөх хэлтэс байгуулж, даргаар нь Эрэн сурвалжлах, хулгайн гэмт хэрэг мөрдөх хэлтсийн даргаар ажиллаж байсан, хошууч Д.Дагвасүрэнг томилсон байна.

Хүн амины хэрэг мөрдөх хэлтсийн даргаар, ОХУ-ын Дотоод явдлын яамны академийг хэд хоногийн өмнө төгсөж ирсэн, дэд хурандаа Д.Отгонжаргал томилогдов. УМБГ-ын Онц хүнд, зохион байгуулалттай гэмт хэрэг мөрдөх хэлтсийн дарга асан, дэд хурандаа Э.Идэрцогийг Хүнд гэмт хэрэг мөрдөх хэлтсийн дарга болгосон байна.

Эрэн сурвалжлах, хулгайн гэмт хэрэгтэй мөрдөх хэлтсийн даргаар дэд хурандаа П.Батбаатарыг томилсон бол Эдийн засгийн гэмт хэрэг мөрдөх хэлтсийн дарга, дэд хурандаа Х.Доржсүрэн, Тамгын хэлтсийн дарга, хошууч Б.Батсуурь нарыг хуучин албанд нь хэвээр үлдээжээ.

Н.Мөрөн