-Монголд цөмийн хаягдлын агуулах барих Япон-АНУ-Монголын гэрээ батлагдах шатандаа орлоо-

Азийн элгэн цээжинд буюу хөх Монголын эзгүй хээр талд орчин цагийн хамгийн хөнөөл уршигтай цөмийн хог хаягдлыг булшлах мэдээлэл зуны аагим халууныг үл ажран хөвөрсөөр намартай золголоо.

Япон+АНУ+Монгол=цөмийн хаягдал гэсэн товчхон хариу бүхий сенсаци мэдээллийн араас хэвлэлийнхэн ч залхуугүй хөөцөлдөж байна. Монголд цөмийн хаягдлын агуулах барих энэ гурван улсын гэрээ үндсэндээ батлагдах шатандаа орсон юм байна. Энэ нь арай эртэдсэн дүгнэлт байж болох ч гэлээ нөгөө талаас ор үндэсгүй гэдгийг нь хэн ч яг таг батлаагүй.

Хамгийн гол нь Монгол улс өөрийн олборлосон ураны хаягдлаа буцаан авах нөхцөлтэйгөөр экспортлох хэлцэл хийж байгааг парламентын эрхэм гишүүн хэлсэн нь сонины хэвлэлийн хуудаснаа баримт болон үлджээ. Японы нэр хүндтэй "Майничи" сонин худлаа бичээгүй нь үүгээр баталгаажиж байна гэх өгүүлбэрүүд хөвөрсөөр.

Гэтэл Цөмийн энергийн газрын Цөмийн технологийн газрын дарга Г.Манлайжав "Цөмийн хаягдлын талаар Америк, Япон, Монголын хооронд гурвалсан гэрээ байгуулах мэдээллийн тухайд бидэнд одоогоор мэдсэн зүйл алга. Цөмийн энергийн газар бол цөмийн энергийн талаар бодлого боловсруулдаг, хэрэгжүүлдэг, хяналт тавьдаг Засгийн газрын дэргэдэх төрийн захиргааны байгууллага.

Аливаа гэрээ хэлцэл байгуулах гэж байгаа бол дэс дарааллын дагуу явагдах ёстой. Жишээ нь, цөмийн хаягдалтай холбоотой асуудал яригдах гэж байгаа бол тусгай ажлын хэсэг хэлэлцэж, яамдаас санал авч Засгийн газраар оруулсны дараа Үндэсний аюулгүй байдлын зөвлөл, дараа нь УИХ-аар шийдэх учиртай.

Цөмийн хаягдалтай холбоотой асуудлыг хуулиар хориглосон байгаа. Дээр хэлсэн үйл ажиллагаа явагдаагүй болохоор бидний зүгээс мэдэх зүйл алга. Янз бүрийн түвшний хүмүүс албан бусаар ярилцсан байхыг үгүйсгэхгүй" хэмээн мэдэгдсэн. Энэ бол албан ёсны хариу. Гэхдээ...