Цахим орчинд "Суга таягтай иргэнд хүч хэрэглэж, зүй бус харьцаж буй төрийн цагдаа" гэх тайлбартай бичлэг цацагджээ. Энэ мэдээллийг цагдаагийн байгууллагаас залруулж ухаан алдсан иргэнд цочроо өгөх үүднээс алгадах, чих үрэх зэргээр мэдрэлийн эсүүдийг сэргээх анхан шатны тусламж үзүүлдэг болохыг тайлбарлав. 

Цагдаагийн байгууллагад “Сүхбаатар дүүргийн 1 хороо “Эвсэг” дэлгүүрийн орчимд согтуу бололтой хүн хөдлөхгүй хэвтэж байна” гэх дуудлага, мэдээлэл өнөөдөр /2023.06.08/ 10.37 минутад иржээ.

Дуудлагын дагуу Сүхбаатар дүүргийн цагдаагийн газрын нэгдүгээр хэлтсийн алба хаагчид тухайн иргэний бие эрүүл мэнд, амь насанд учирч болох эрсдэлээс урьдчилан сэргийлэх, ухаан санааны байдлыг үнэлэх, эмнэлэгийн анхан шатны тусламж үзүүлэх зорилгоор, ам, хамар, уруулын гурвалжинг дарах, чихийг үрэх зэргээр амилуулах суурь анхан шатны тусламж үзүүлжээ.

Улмаар иргэнийг сэрээн эрүүл мэндийн байгууллагад үзлэг хийлгэж, хордлогын эмчилгээ хийлгэхээр “Энэрэл” эмнэлэгт хүргэсэн байна.

Эх сурвалж: ЦЕГ