Улаанбаатар хотын төв замын нэгдүгээр эгнээг хааж засвар хийж буй талаар өмнө нь мэдээлж байсан. Одоогийн байдлаар зам засварын ажил дөнгөж эхлэл төдий байв. "КТК", "Төгс зам" компани Нийслэлийн авто замын газартай гэрээ байгуулж баруун дөрвөн замаас зүүн дөрвөн замын өргөтгөл шинэчлэлтийг гүйцэтгэж байна. Мөн Монголын үйлдвэрчний эвлэлийн соёлын төв ордны өмнөх төв замаас зүүн дөрвөн зам хүртлэх замыг шинэчилэн засч байна. Өчигдрөөс эхлэн энэ сарын 30-ныг хүртэл засвартай нийт замын хоёр талын урсгалын нэгдүгээр эгнээг хаасан. Харин энэ сарын 7-ноос эхлэн замуудыг уулзвар бүрээр нь хаах аж. Зам хаах хуваарийг хүргэж байна.

Уг хуваарийн дагуу тээврийн хэрэгслийн зорчих хөдөлгөөнийг хаах аж. Мөн засварын ажлын үер шаардлагатай зарим газарт автобусны буудал өргөтгөн барих юм. Замыг богино хугацаагаар хаах тул авто машины хөдөлгөөнд саад учруулахгүй хэмээн үзэж байна. Зам хаасантай холбогдуулж автомашин хаагуур зорчихыг замын цагдаа тухай бүрт нь зохицуулах аж. Дашрамд дурьдахад, нийслэлийн авто замын 80 гаруй хувь нь 25 жилийн даацтай байдаг бөгөөд урсгал болон их засварт жил бүр оруулдаг байна. Энэ жил 40 гаруй аж ахуйн нэгж урсгал засвар хийхээр тендерт өрсөлдөж үүнээс 20 байгууллага засварын ажил хийжээ. Одоогийн байдлаар урсгал засварын ажил дууссан байна. Нийт 57 гудамж талбайн замд урсгал засварын ажил хийжээ.

О.Урантогос