Гамшгийн улмаас хорогдсон малын сэг, зэмийг устгах, ариутгал, халдваргүйжүүлэлтэд зарцуулах 5,5 тэрбум төгрөгийг Монгол Улсын Засгийн газрын хуралдаанаар баталсан тухай зарим хэвлэл, мэдээллийн хэрэгслээр ташаа мэдээлсэн байна.

Улсын Онцгой комисс энэ сарын 22-ны өдрийн хурлаар Онцгой байдлын ерөнхий газар, Мэргэжлийн хяналтын ерөнхий газар, Мал эмнэлэг, үржлийн газрын хамтарсан Ажлын хэсгийн мэдээллийг сонссон. Хорогдсон малын сэг, зэмийг устгах, халдваргүйжүүлэх ажилд 5,5 тэрбум хэрэгтэй гэсэн тооцоог Ажлын хэсэг гаргасан бөгөөд хийх ажлынхаа төлөвлөгөөг танилцуулсан юм.

Устгал, ариутгал, халдваргүйжүүлэлтийн эхний шатыг гуравдугаар сарын 20-ны дотор, дараагийн шатыг дөрөвдүгээр сард багтаан хийхээр төлөвлөсөн байна. Улсын Онцгой комисс асуудлыг хэлэлцээд Засгийн газрын хуралдаанд оруулж танилцуулахаар тогтсон гэж Засгийн газрын Хэвлэл, мэдээллийн албанаас мэдээллээ.

http://www.niigmiintoli.mn/