Улсын заан М.Өсөхбаяр согтуугаар жолоо мушгиж яваад осол гарган хүний аминд хүрэх дөхжээ. Өнгөрсөн пүрэв гаригийн орой тэрбээр Нийслэлийн авто замын газрын ойн баярын бөхийн барилдаанд оролцчихоод буцаж явсан гэнэ. Ингэхдээ баярлаж найралсан хүмүүсийн өгсөн аяга тагш зүйлээс татгалзалгүй уусаар нэлээн ч халамцуу болсон гэнэ.

Дараа нь “Nissan Patrol” маркийн 00-46 УБТ улсын дугаартай машинаа унан Сүхбаатар дүүргийн I хороо, Чингэсийн өргөн чөлөөгөөр явахдаа “Toyota Exsiv” маркийн 74-85 УБХ улсын дугаартай авто машиныг мөргөжээ. Зүгээр ч нэг шүргэсэн юм биш. Бүр молоконы лааз, базсан цаас шиг болтол нь дайрч. Харин мөргүүлсэн машины жолооч, 24 настай Ц.Батбаяр азаар амьд үлдсэн ч сэтгэл санааны гүн шоконд оржээ.

“Баянгол” рестораны зүүн замд болсон энэ хэргийг олон хүн харсан юм билээ. Энэ үед аархуу заан омогдон гарч ирээд “Хохирлыг чинь барагдуулна. Хоёулаа зургаан сая төгрөгөөр тохиролцчихъё” гэсэн юм ярьж байжээ. Эх сурвалжийн мэдээлж байгаагаар М.Өсөхбаяр хурд хэтрүүлэн давхиж, эсрэг урсгал руу орон дээрх ослыг гаргасан байна. Түүний согтолтын зэрэг 1.80 хувьтай гарсан гэж байгаа ч бүтэн өгүүлбэр хэлчихэж чадахгүй тультарч байжээ. Гэхдээ хохирогч түүнтэй тохиролцоогүй юм гэсэн.
 
Б.Өлзийдэлгэр