Афганистан Улсад үүрэг гүйцэтгэх Афганистан дахь “Тогтвортой эрх чөлөө” ажиллагаанд үүрэг гүйцэтгэх Цэргийн хамгаалалтын ротын VI ээлж, Нисдэг тэрэгний техник, засвар үйлчилгээний сургалтын багийн IV ээлжийн цэргийн багийн бүрэлдэхүүнийг үдэн гаргах ажиллагаа “Чингэс хаан” Олон Улсын нисэх онгоцны буудалд боллоо.  

Арга хэмжээнд Батлан хамгаалахын сайд Ж.Энхбаяр, БХЯ-ны төрийн нарийн бичгийн дарга, дэслэгч генерал Ц.Тогоо, ЗХЖШ-ын дэд дарга, хошууч генерал Б.Баярмагнай, АНУ-аас Монгол Улсад суугаа элчин сайдын яамны Батлан Хамгаалах болон армийн атташе дэд хурандаа Жонатан Лау болон БХЯ, ЗХЖШ-ын удирдлага оролцож энхийг сахиулагчдаа ажиллагааны газар орон луу үдэж мордууллаа.

Афганистан улсад үүрэг гүйцэтгэх цэргийн багт Зэвсэгт хүчний 25 анги, байгууллагын 130 гаруй цэргийн алба хаагч ажиллагааны өмнөх бэлтгэлийг хангаж үүрэг гүйцэтгэх бэлтгэлийг хангаж дэлхийн халуун цэг болсон Афганистан улсыг зорьж байна.

Цэргийн багийн бүрэлдэхүүнээс  “Иракийн эрх чөлөө” ажиллагаа, Сьерра Леон Улс дахь НҮБ-ын энхийг сахиулах ажиллагаа, “Афганистаны үндэсний армийг хөгжүүлэх хөтөлбөр”-ийн хүрээн дэх артиллерийн сургалтын хөдөлгөөнт багт, Косово Улс дахь “KFOR”  ажиллагаа, Чад дахь НҮБ-ын ЭСА зэрэгт  70 хувь нь НҮБ-ын энхийн болон олон улсын бусад ажиллагаанд өмнө нь үүрэг гүйцэтгэж байсан ажиллагааны туршлагатай баг бүрдэн үүрэг гүйцэтгэж байгаа юм.

2002 оноос хойш өнгөрсөн 10 жилийн хугацаанд Монгол Улсын энхийг сахиулагч цэнхэр дуулгатнууд  Ирак, Сьерра Леон, Чад, Баруун Сахар зэрэг 3 тивийн 14 ажиллагаанд 5640 гаруй цэргийн алба хаагч үүрэг гүйцэтгэсэн бөгөөд  яг одоо  440 гаруй энхийг сахиулагчид Судан улсын Дарфур муж, Өмнөд Судан, Афганистан, Баруун сахар зэрэг улсуудад эх орныхоо нэрийг өндөрт өргөн үүргээ гүйцэтгэж байгаа юм.    

М.Жаргал