Энэ сарын 9-нд “Парламент” телевизийн сэтгүүлч Г.Гэрэлмаа “Дугуй цагаан” амралтын газраас шууд дамжуулалт хийх үеэр Хан-Уул дүүргийн цагдаа нар түүний биед халдсан хэрэг гарсан юм.

Тус амралтын газрын эзэн нийслэлийн удирдлагаас гаргасан шийдвэрийг эсэргүүцсэн тул цагдаа нар түүнийг хүч хэрэглэн баривчилжээ. Энэ үйл явдлыг шууд дамжуулж байсан сэтгүүлчид цагдаа нар хүрч, гар утас, камерийг нь хураан аваад, зарим бичлэг, зургийг устгасан, хэвлийн тус газарт нь хэд хэдэн удаа цохисон, амыг нь дараад одоо хашхир хэмээн басамжилсан байна. Иймд олон нийтийн мэдэх эрхийн төлөө ажилладаг сэтгүүлчийн биед халдан, үндэслэлгүйгээр зургаан цагийн турш хорьсон, цагдаа нарын хүнлэг бус үйлдлийг эсэргүүцсэн сэтгүүлчид Сүхбаатарын талбайд тайван жагсаал зохион байгуулав.