"Монголын тогтвортой санхүүгийн форум"-ын "Эрчим хүчний хэмнэлттэй сууцны санхүүжилт" салбар хэлэлцүүлэг өнөөдөр боллоо.

Хэлэлцүүлгийн үеэр 2020 оноос хэрэгжүүлж эхэлсэн "Эрчим хүчний хэмнэлттэй амины орон сууцны санхүүжилтийн туршилтын төсөл"-ийн явцын талаар мэдээлэл өгөв.

"Монголын тогтвортой санхүүгийн форум"ын төсөл, хамтын ажиллагааны менежер М.Оюунгэрэл "Хоёр жилийн хугацаанд хэрэгжсэн төслийн хүрээнд 26 өрхөд урьдчилгаа төлбөртэй, эрчим хүчний хэмнэлттэй амины орон сууцны ипотекийн зээл олгосон.

Төслийн төлөвлөгөөгөөр 40 айлд зээл олгох байсан ч цар тахлын улмаас энэ тоонд хүрээгүй. Айлууд барилгынхаа нийт үнийн дүнгийн 20 хувийг төлөөд, төслөөс 20 хувийг нь санхүүжүүлж, үлдсэн 60 хувийг банкны 6-12 хувийн хүүтэй зээлээр шийдэж байна.

Нийт 20 гаруй барилгын компаниуд оролцож эрчим хүчний хэмнэлттэй олон төрлийн загвар барилгуудыг санал болгосон. Гэр хорооллын амины орон сууц тул 60 м.кв-аас бага талбайтай 80 сая төгрөгөөс бага дүнтэй байшингуудыг санхүүжүүлсэн.

Зөвхөн урьдчилгаа төлбөрт зориулан төслөөс нийт 550 сая төгрөг гарсан. Айлуудын зарим нь байшиндаа сэтгэл хангалуун байгаа бол зарим нь гомдолтой тохиолдол бий. Баригдсан бүх барилгууд 20-80 хувийн эрчим хүчний хэмнэлттэй.

Нэг барилга нь олон улсын ногоон барилгын үнэлгээний батламж авсан. Монголд баригдсан, ногоон барилгын батламж авсан анхны амины орон сууц гэсэн үг. Байшингуудын дулаалга олон янз ба гал түлэхгүй байхаар халаалтаа шийдсэн. Барилгууд Чингэлтэйн ам, Шархад, Бэлх зэрэг газруудад баригдсан" гэв.

Энгийн байшинтай өрхүүд 1 мкв-д жилдээ 600-700 кв цаг эрчим хүчийг халаалтдаа зарцуулдаг. Харин уг төслийн байшингууд нь жилдээ 240 орчим кв цаг зарцуулна гэж төслийн багийнхан жилийн өмнө хэлж байв.

Германы олон улсын хамтын ажиллагааны нийгэмлэгийн эрчим хүчний хэмнэлтийн төслийн захирал Дуняа Хоффманн "Тус нийгэмлэгээс Монголд хэрэгжүүлсэн төсөл өөр аль ч улсад хэрэгждэггүй. Монголын банкны салбарын санаачилгаар төсөл эхэлсэн. Төсөл хэрэгжих үед Монголын зах зээлд амины орон сууц барих ямар ч зээл байгаагүй. Улмаар эрчим хүчний хэмнэлттэй орон сууц барих зээл олгох боломж бий болгосондоо баяртай байна.

Германы нийгэмлэгээс 22 цэцэрлэг, сургуулийн барилгыг дулаалж, агаар сэлгэлтийг нь сайжруулсан. Улмаар тус барилгууд эрчим хүчээ тав дахин хэмнэдэг болсон. Цэцэрлэг сургуулийг дулаалснаар мөн багш нарын өвчтэй өдрийн тоо 78, хүүхдүүдийн өвчтэй өдрийн тоо 58 хувиар буурсан. Хүмүүс нэгнээсээ туршлага судалж, энэ зээлд хамрагдах тохиолдол их бий. Иймээс хүн бүрт энэ талаар мэдүүлэх их чухал байна. Бодлого боловсруулагчид үүнийг үргэлжлүүлэн авч явах нь чухал" хэмээв.