Монголд хууль бус үйл ажиллагаа явуулж байсан Хятадын 800 иргэнийг цагдаа, тагнуулынхан илрүүлснээ энэ долоо хоногт олон нийтэд мэдээлсэн. Хууль, хяналтын байгууллагынхан энэ хууль бус ажиллагааны талаарх мэдээллийг өнгөрсөн наймдугаар сараас авч эхэлсэн бөгөөд эхний ээлжинд 80 хүн орж ирснээс хойш хүний тоо аажмаар өссөөр 800-д хүрсэн байна.

Хятад иргэд 1000-аад компьютер, 10 мянгаад гар утас, 100 орчим утасны сим карт ашиглаж байсныг илрүүлэн шалгаж буй юм.

“Энэ арга хэмжээг зохион байгуулсан хүн нь тодорхой байгаа. Уг ажиллагааг удирдан, зохион байгуулсан хэрэгтэй холбогдуулан Хятадын талаас дөрөв, манай талаас нэг иргэнийг саатуулан шалгаж байна. Бусдыг нь байрлаж байсан таван зочид буудалда бүрэн хяналтад байгаа. Энэ асуудлыг одоогийн байдлаар мөнгө угаах гэмт хэрэгтэй холбоотой гэж үзэж байна. Тоглоом хэлбэрээр байж болно. Өөр хэлбэрээр ч байж болно. Үүнийг тогтоох ажиллагаа үргэлжилж байна. Хураасан бүх хардуудыг үзнэ. Манай Мэдээллийн технологийн багийнхан ажиллаж байна” хэмээн Тагнуулын ерөнхий газрын дарга Д.Гэрэл мэдээлсэн.

Энэ мэдээлэлтэй холбогдуулан БНХАУ-аас Монгол Улсад суух Элчин сайдын яамнаас мэдэгдэл гаргасан. Мэдэгдэлдээ “Хятад, Монгол хоёр тал хууль сахиулах, аюулгүй байдлын салбарынхан энэ хэрэг дээр нягт хамтран ажиллаж байна” хэмээсэн юм.