Өнөөдөр дэлхийн сүрьеэтэй тэмцэх өдөр. Дэлхий дахинд сүрьеэ өвчин КОВИД-19-ийн дараах, нас баралтад хүргэж буй хоёр дахь халдварт өвчинд тооцогддог. 2021 онд 10.6 сая хүн сүрьеэгээр өвчилжээ. Үүний зургаан сая нь эрэгтэй, 3,4 сая нь эмэгтэйчүүд, 1.2 сая хүүхдүүд нь байсан аж.

Харин манай улсад өнгөрсөн жил 2534 сүрьеэгийн тохиолдол бүртгэжээ. Үүний 174 (7.4 хувь) нь хүүхэд байна. Сүрьеэгийн тохиолдлын 60 орчим хувийг Улаанбаатарт бүртгэжээ. Мөн өвчлөгсдийн 60 хувь нь 15-44 насныхан буюу хөдөлмөрийн насныхан байгаа нь харамсалтай. Нэг өвчтөний зургаан сарын эмчилгээ болох эмийн үнэ 550 мянган төгрөг байна.

Манай улсын сүрьеэгийн эмчилгээний амжилтын үзүүлэлт 90 хувь байгаа нь дэлхийн дундаж болон өвчлөл ихтэй улс орнуудаас өндөр. Гэсэн ч сүрьеэгийн өвчлөл өндөр байгаа нь сүрьеэд зарцуулах санхүүжилт хангалтгүй, мөн хүн амын буруу амьдралын дадал зэрэгтэй хамаатай.

Манай улс НҮБ-ын гишүүн орны хувьд өнөөдөр сүрьеэгийн эсрэг олон нийтэд чиглэсэн үйл ажиллагааг өргөн хүрээнд зохион байгуулж, сүрьеэгийн эсрэг дуу хоолойгоо хүргэсээр ирсэн. Монгол ДЭМБ-ын Номхон далайн баруун эргийн бүсийн 37 орноос сүрьеэгийн өвчлөл өндөртэй долоон улсын нэг болж дөрөвдүгээрт оржээ.

Өнөөдөр Тусгаар тогтнолын ордонд “Тийм ээ! Бид сүрьеэ өвчнийг устгаж чадна” уриан дор өдөрлөг болж байна.

Өдөрлөгөөр ХӨСҮТ-ийн СТСА-ны үзлэг хяналтын тасгийн эрхлэгч П.Насанжаргал “КОВИД-19 оос хойш бид сүрьеэ өвчлөлтийг 30 орчим хувиар бууруулж чадсан.  

Гэхдээ эмнэлгийн талаас сүрьеэтэй тэмцсэн ч давхар нийгмийн туслалцаа шаардлагатай. Манай салбарын ажилчдын дийлэнхийг КОВИД-19 руу татан ажиллуулсан нь сүрьеэгийн өвчтөний тоо нэмэгдсэн шалтгааны нэг. Хэдий  сүрьеэ үхэлд хүргэдэг ч эмчийн зааврыг дагавал эдгэрдэг өвчин” гэв.

Сүрьеэ өвчний шинж тэмдэг:

- Турж эцэх
- Хоолонд муудах
- Унтахдаа хөлрөх
- Ядрах
- Халуурах
- 3 долоо хоног, түүнээс удаан ханиах
- Цустай цэр гарах
- Цээжээр өвдөх зэрэг шинж илэрнэ.

Б.Отгонбаатар