АНУ-ын Корнелийн их сургууль болон “Уужим” төслийн багийнхан хамтарч “Монгол хөгжмийн өдрүүд” сарын арга хэмжээний хүрээнд нэрт хөгжмийн зохиолч Б.Шаравын зохиолуудыг эгшиглүүлжээ. Тоглолт аравдугаар сарын 20, 22-нд Нью-Йорк мужийн Корнелийн “Барнс Холл”-д болсон байна. 

Төгөлдөр хуурч, төгөлдөр хуурын ухааны доктор Э.Мөнхшүр нь Б.Шаравын төгөлдөр хуурт зориулсан бүтээлүүдийг хөгжимдсөн байна. 

Удирдаач, профессор Леранжис Хэнтий нутагт төрсөн хөгжмийн зохиолч Б.Шаравын бага нас, малчин гэр бүлд өссөн амьдралын замнал, уран бүтээлийнх нь тухай түүхэн тайлбартай тоглолтыг үзэгчдэд хүргэжээ.  

“Уужим” төслийнхний хоёр дахь тоглолт нь монголчуудын амьдрал бол Монгол орны байгаль, нүүдлийн мал аж ахуйтай салшгүй холбоотойг Б.Шаравын том хэлбэрийн хөгжмийн бүтээлүүдээр өгүүлсэн байна. 

Тэр дундаа “Хэрлэнгийн домог”, морин хуурын концерт бүтээлүүдийг морин хуурч Г.Уртнасан, уртын дуучин Б.Ганчимэг нар гоцлон профессор Леранжис удирдав. Тоглолтод Корнелийн их сургуулийн 40 гаруй уран бүтээлч оролцжээ. 

“Монгол хөгжмийн өдрүүд” сарын ажлыг аравдугаар сарын 1-нд ӨМӨЗО-ы Хөлөнбуйр хотын уугуул, алдартай хөөмийч Х.Тамирын тоглолтоор эхлүүлсэн байна. Тэрбээр Монгол, Өвөрмонгол, Тува зэрэг орны дуунуудаар монголчуудын дуулах, эгшиглүүлэх, тоглох арга барилын онцлогийг үзэгчдэд сонордуулжээ.  

Хүмүүнлэгийн ухааны нийгэмлэгээс ивээн тэтгэсэн уг тоглолтууд нь Монгол, АНУ-ын хооронд хөгжмийн солилцоог дэмжих зорилгоор профессор Леранжис, төгөлдөр хуурч Э.Мөнхшүр нарын үүсгэн байгуулсан “Уужим” төслийн нэг хэсэг ажээ.