Түүхэн болон уламжлалт үнэт зүйлсийн судлалыг орчин үеийн хөгжлийн чиг хандлага, технологийн дэвшил, нийгмийн харилцааны жам ёсны зарчмаар уялдуулан авч үзэж, ирээдүйн манлайлагчдын байнгын түншлэлийг бэхжүүлэн, хамтын ажиллагааны цар далайцыг тэлэх зорилготой “Алтай дамнасан тогтвортой байдлын яриа хэлэлцээ” чуулга уулзалт өнөөдөр эхэллээ.

Дэлхийн нэр хүнд бүхий улс төрчид, эрдэмтэн, судлаачид зэрэг 10 орны 52 нэр хүндтэй зочид ирээд байна.

“Жендерийн эрх тэгш байдал ба Тогтвортой хөгжил” сэдэвт энэ удаагийн чуулга уулзалтын салбар хэлэлцүүлгээр Алтай судлалын орчин үеийн чиг хандлагыг ярилцаж, Алтай дамнасан улс орнуудын соёл, түүх, уламжлал, угсаатны харилцан хамаарал, тэдгээрийн тогтвортой хамтын ажиллагааг хөгжүүлэхэд анхаарал хандуулах юм.

Энэхүү олон улсын чуулга уулзалтад дэлхий нэр хүнд бүхий улс төрчид, эрдэмтэн, судлаачид зэрэг 10 орны 52 нэр хүндтэй зочид ирээд байна.

Тодруулбал,

• БНСУ-ын Үндэсний Ассамблейн дэд дарга Ким Ён Жү, “Бан Ги Мун” сангийн тэргүүн, НҮБ-ын 8 дахь Ерөнхий нарийн бичгийн дарга Бан Ги Мун,
• АНУ-ын Стэнфордын Их сургуулийн Ази-Номхон далайн Судалгааны төвийн захирал Жи Вүк Шин
• БНСУ-ын Эва эмэгтэйчүүдийн Их сургуулийн ерөнхийлөгч Юн Ми Ким,
• Түрэг улс орнуудын парламентын ассамблейн Ерөнхий нарийн бичгийн дарга Мэхмэт Сурейя Эр нар бол энэхүү чуулга уулзалтын хүндэт зочид юм.

Мөн

• Стэнфордын Их сургуулийн Боловсролын дэд профессор Кристин Мин Вотипка,
• Япон Улсын Шига мужийн Отсу хотын дарга асан Наоми Коши,
• Тайланд Улсын Таммасат Их сургуулийн профессор Чалидапорн Сангамфан,
• Стэнфордын Их сургуулийн Ази, Номхон далайн Судалгааны төвийн дэд захирал Киёотерү Цүцуй,
• Филиппин Улсын Конгрессын гишүүн Хосе Ф.Б.Бенитес,
• Индонезийн Их сургуулийн профессор Миа Сискавати,
• Эва Их сургуулийн профессор Юун-Шил Ким нарын  эрдэмтэн, судлаачид тус чуулга уулзалтад илтгэл тавьж, хэлэлцүүлэгт оролцоно.

Алтай судлалын чиг хандлага хэмээх хоёр хэсэг хуралдаанаар Алтай дамнасан орнуудын соёл, түүх, уламжлал, тогтвортой хамтын ажиллагаа, түншлэлийн талаар хэлэлцэхээр төлөвлөжээ.