1. Т.Дүгэрдорж – Б.Зоригтбаатар. Сумын цолтны барилдаанд хүч сорьж явсан залуус гурвын даваанд таарав. Ухасхийн хөлд ороход нь тосгуулж хавираад цэргийн арслан нь давсан юм.

2. Х.Гантулга – Ц.Мөнхбаяр. Их шөвгийн барилдаан. Бяртай харцага барьцаа алдаагүй тул үзүүрт барилдах эрхтэй болов.

3. Д.Тогтохжаргал – М.Бадарч. Бадарч харцага гурвын даваанд чанга ам авсан. Харин чанга ам нь харцагыг тун чанга унагасан юм.

4. Б.Амарзаяа – У.Береке. Аралтай бөхчүүд дөрвийн даваанд таарав. Амарзаяа начин бүх талаар илүүрхсэн билээ.

5. Ч.Хөхчирэнгэр - Х.Гантулга. Чацуутнууд үзүүр булаалдлаа. Энэ намар өнгөтэй байгаа начин нь сугадаж хавиран давж, түрүүлэв.

6. Ц.Мөнхбаяр – Б.Одгэрэл. Дөрвийн давааны сүүл хүртэл хүч үзсэн хоёр бөх. Барилдаанч харцага баруун талд нь мордсон боловч аралтай арслан дагуулаад мушгичихлаа.

7. Ч.Хөхчирэнгэр – Б.Амарзаяа. Их шөвөгт начингууд тунав. Нягт барилдаант өсөх идэр начин давлаа.

8. Т.Дүгэрдорж – Р.Пүрэвдагва. Цэргийн арслан Төрмөнхийн Дүгэрдорж амаргүй бөх болохоо харуулав. Арслан харин засуул сануулсан хойно мэх хийсэн хэмээн үзсэн юм.

9. О.Баярцогт – Б.Батмөнх. Увс аймгийн нэмэх начин Очирын Баярцогт сүүлийн үед барилдаж харагдаагүй. Харин энэ намар бэлтгэл хийж буй бололтой. Заан Б.Батмөнхийг суйлаад дайрчихав.

10. Б.Батдорж – О.Эрдэнэбат. Өвөрхангайн аралтай арслан Хэнтийн барилдаанч харцагыг харцагадаж мушгин чимээтэй хаяв. Батсүхийн Батдорж арслан хэнтэй ч ингэж барилдах бүрэн боломжтой бөх билээ.