Апу Саркер 22 настай, Бангладешийн тосгонд гэр бүлтэйгээ хамт амьдардаг. Түүний аав, өвөө газар тариалан эрхлэгчид бол тэр сувилагч мэргэжилтэй.  

Гэхдээ түүний гэр бүлийн эрчүүд төрөлхийн хурууны хээгүй төрдөг байна. Апу “Миний өвөө хурууны хээгүй байсан нь түүнд ямар ч асуудал үүсгээгүй байх” гэжээ. Харин өнөө үед хүний хурууны хээг дахин давтагдашгүй онцлогийнх нь улмаас хаа сайгүй бүртгэх болсон юм. Хил нэвтрэх, сонгуульд оролцох, гар утас худалдан авахад хурууны хээ шалгах нь энгийн үзэгдэл боллоо.          

2008 онп Апу хүүэд байхад Бангладешт бүх насанд хүрсэн иргэндээ иргэний шинэ үнэмлэх олгож, хурууны хээ бүртгэж эхэлжээ. Энэ үед бүртгэлийн ажилчид Апугийн аав Амал Саркерт хэрхэн үнэмлэх олгохоо гайхан, арга мухардсан байна. Ингээд тэд түүний үнэмлэх дээр “хурууны хээгүй” гэж бичжээ. Тус улсад 2010 оноос эхлэн паспорт, жолооны үнэмлэх авахад ч хурууны хээгээр бүртгүүлдэг болсон. Иймд Амал Саркер хэд хэдэн оролдлогын эцэст эрүүл мэндийн байгууллагаас лавлагаа гаргуулж, пасспорттой болжээ. Гэсэн ч тэр онгоцны буудалд асуудал үүсэхээс болгоомжлон, паспортoo огт ашиглаагүй байна. Мөн жолооны үнэмлэх авч чадаагүй аж. Тэр шалгалтаа сайн  өгсөн ч албаны хүмүүс жолооны үнэмлэх олгоогүй.        

Харин Апу 2016 онд гар утсандаа сим карт авах гэтэл хурууны хээгээ уншуулахыг хүсжээ. Тэрээр хэд хэдэн удаа оролдсон ч түүнд хурууны хээ байхгүй тул ээжийнхээ нэр дээр карт авсан байна.             

Хүн хурууны хээгүй байхыг адерматоглифиа буюу арьсны хээний элементгүй байх гэж нэрлэдэг.

Нэг залуу эмэгтэй АНУ-ын хилээр нэвтрэх үед асуудал гарчээ. Түүний пасспорт дээрх зураг гадна төрхтэй нь нийцэж байв. Харин бүх хуруу нь хээгүй байсан тул хилийн мэргэжилтнүүд түүнийг нэвтрүүлэхээс татгалзжээ. Тэр бүсгүйн гэр бүлийн найман гишүүнд ч мөн хурууны хээ байдаггүй. 2007 онд Швейцарын эмч Петер Итин энэ мэдээг дэлхий нийтэд анх удаа дуулгажээ.  Тэдний гарын хөлсний булчирхай бусад хүмүүсийнхээс бага байдгийг ч олж тогтоосон байна.  Энэ нь маш ховор тохиолддог өвчин бөгөөд өнөөг хүртэл цөөн гэр бүлийг л бүртгэжээ.          

Петер Итин эмчийн баг бүсгүйн гэр бүлийнхний ДНХ-г судлаад SMARCAD1 хэмээх ген өөрчлөгдөн хувьссаны улмаас хурууны хээгүй болдгийг тогтоосон байна. Үүнээс өмнө энэ генийн талаар эрдэмтэд юу ч мэддэггүй байв. Мөн энэ ген өөрчлөгдсөнөөр өөр өвчин үүсгэдэггүй. Гэхдээ өвчтөний гэр бүлийн олон үеийнхэнд удам дамжин нөлөөлнө гэдгийг тогтоосон байна. Профессор Петер энэ өвчнийг цагаачлалыг хойшлуулдаг өвчин гэж нэрлэжээ.

Харин мэдээний  эхэнд танилцуулсан Апугийн гэр бүлийг энэ өвчний өөр хувилбараар өвчилсөн гэж үзэж байна.

Эх сурвалж: BBC.com