Орхон аймгийн Нийгмийн даатгал болон улсын бүртгэлийн хэлтсээс мэдээлэл хийх үеэр тус аймагт 99 хүүхэд эцэг эх нь хол тусгаарлагдаж, эцэг эхийн хараа хяналтгүй байгааг хэллээ.

Тодруулбал нэг болон есөн настай хүүхдүүдээ Хялганат тосгонд гэртээ үлдээсэн. Ээж нь Эрдэнэт хотод ирж амаржаад тусгаарлагдсан тохиолдол байна. Энэ мэт олон тохиолдолд ямар арга хэмжээ авч буй талаар халамжийн мэргэжилтэн "Бид судалгаа явуулж байгаа бөгөөд одоогийн байдлаар хөл хорионы улмаас эцэг эх нь хол тусгаарлагдсан 99 хүүхэд байна. Үүнээс 30 гаруй нь онцгой нөхцөлд байна. Бид энэ дагуу хүүхэд хамгааллын зураглалыг баг багаар нь гарган, тухайн хорооны хамтарсан баг анхааралдаа авч ажиллаж байна. Дээр нь ЕБС-ийн анги удирдсан багш нар өдөр бүр хүүхдүүдтэйгээ холбогдон ажиллаж байна. Мөн аймгийн Хүүхэд хамгааллын шуурхай ажлын хэсэг хариу арга хэмжээг авч ажиллаж байна гэлээ.

Нэмж мэдээлэхэд, Улсын Онцгой комиссын даргын 2020.11.19-ны 26 дугаар тушаалаар томилогдсон Шуурхай бүлэг 11 хүний бүрэлдэхүүнтэй Орхон аймагт энэ сарын 19-ны өдрөөс эхлэн ажиллаж байна. Тус аймгийн хувьд энэ сарын 17-ны өдөр коронавируст халдварын анхны тохиолдол бүртгэгдсэнээс хойш 17 тохиолдол бүртэгдээд байна. Халдвар авсан хүмүүсийг ХӨСҮТ-д эмчилж байгаа бөгөөд ойрын хавьтал болох 409 хүнийг шуурхай тогтоон, тусгаарлан ажиглах байранд шилжүүлсэн талаар ОБЕГ-ын Гамшгаас урьдчилан сэргийлэх газрын Сургалт, сурталчилгааны хэлтсийн дарга, дэд хурандаа Д.Бат-Эрдэнэ мэдээллээ. Өчигдрөөс Орхон аймгийн хэмжээнд 3 хоногийн “ТЭГ ЗОГСОЛТ”-ыг эхлүүлээд байна. Иргэдэд хоол хүнс болон бусад шаардлагатай зүйлсийг хүргэлтийн үйлчилгээгээр зохицуулж буй юм.