Хэрэв Та зуны амралтаа хэрхэн өнгөрүүлэхээ төлөвлөөгүй байгаа бол маргааш буюу зургадугаар сарын 21-нийг дуустал Мишээл экспо төвд үргэлжлэх аялал жуулчлалын анхны томоохон үзэсгэлэн болох “Улаанбаатур”-ыг зориорой.

Өчигдөр нээлтээ хийсэн уг үзэсгэлэнд 21 аймгийн төлөөлөл, улсын тусгай хамгаалалттай газар нутгууд, гадны долоон улсын элчин сайдын газар, гадаад аяллын компаниуд, жуулчны бааз, амралтын газрууд, тээвэр, даатгал, аяллын техник хэрэгслийн компаниуд, соёл урлаг, үзвэр үйлчилгээний газрууд, аяллын клубууд аялал, амралттай холбоотой худалдаа, үйлчилгээ эрхлэгч нийт 80 байгууллага, нэгжийн төлөөлөл оролцож байна.

Тиймээс та энэхүү үзэсгэлэнгээр зочлон хаашаа явахаа шийдэж, цаашилбал хэрэгтэй аяллын хэрэгслээ худалдаж авах боломжтой юм.

Өчигдрөөс эхэлсэн аялал жуулчлалын үзэсгэлэн хүн хөдөлгөөн ихтэй байлаа. Учир нь зуны дэлгэр цаг ирсэн учраас бүгд л амралтаа ая тухтай өнгөрүүлэхийг хичээх нь мэдээж. Тиймээс ч бүхий л мэдээ, мэдээллийг нэг дор багтаасан “Улаанбаатур” үзэсгэлэн цаг үеэ олсон үйл ажиллагаа болж байна.

Г.Содномсамдан: Хүн үүслийн өлгий нутаг аялал, Дөрвөн түмэн сарлагийн баяр энэ жил болно

Улаанбаатур үзэсгэлэнд оролцож буй Баянхонгор аймгийн Байгаль орчин, аялал жуулчлалын газрын мэргэжилтэн Г.Содномсамдан үзэсгэлэнд оролцож буй зорилгынхоо талаар,

-Дотоодын аялагчдыг татахын тулд бүх бүтээгдэхүүн, үйлчилгээ маань сайн байх ёстой. Тэр мэдээллээ сайн түгээх хэрэгтэй. Тухайн аймгийг юу илэрхийлдэг, тэрийгээ сайн сурталчилж, олон нийтэд таниулж байж аялал жуулчлал сайн байна гэсэн үг. Тиймээс энэ удаагийн үзэсгэлэн чухал ач холбогдолтой болж байна.

Манай аймаг аялал жуулчлалын арга хэмжээ болон дотоод, гадаадын жуулчдыг аялалын маршрутыг танилцуулахаар ирсэн. Наадмын дараа, долдугаар сарын 16-наас 20-ны хооронд “Хүн үүслийн өлгий нутаг” аяллыг манай аймгаас зохион байгуулахаар болсон. Цагаан агуй, Бичигт хад, Орог нуур зэрэг түүх соёлын газрууд болон үзэсгэлэнт байгальтай газруудаар явах аялал байгаа юм. Мөн наймдугаар сарын 14-нөөс 16-ны хооронд “Дөрвөн түмэн сарлагийн баяр” болно. Баянхонгор аймгийн Богд, Баянлиг сумын ой энэ жил болж байгаа учраас нутгийн уугуул, суугуул иргэд мөн манай аймгийг үзээгүй иргэд байвал дээрх үйл ажиллагаануудыг сонирхоорой гэж хэлмээр байна гэлээ.

21 аймгийн төлөөлөл хүрэлцэн ирж, өөрийн аймгийн аяллын чиглэл, амралтын бааз, зочид буудлын мэдээллийг өгч байна. Мөн томоохон жуулчны баазууд үнийн санал болон үзүүлэх үйлчилгээ зэргээ ч хэрэглэгчдэд мэдээлж байгаа юм.

Үзэсгэлэнгийн талаар Нийслэлийн аялал жуулчлалын газрын дотоодын аялал жуулчлалын мэргэжилтэн Н.Алтанзаяагаас тодруулахад,

-Байгаль орчин ногоон хөгжлийн яам, Нийслэлийн аялал жуулчлалын газар, Улаанбаатарын аялал жуулчлалын холбоо хамтран дотоодын амрагчдад зориулсан дотооддоо, гадагшаа аялах аяллын төлөвлөгөө гаргахад туслах зорилготойгоор үзэсгэлэнг зохион байгуулж байна.

Энэ удаад 21 аймгийн төлөөлөл аймгийнхаа мэдээллийг нэг дороос өгч, томоохон компаниуд бүтээгдэхүүн үйлчилгээгээ танилцуулж, Нийслэлийн аялал жуулчлалын газраас зочид буудал, жуулчны баазын зөвшөөрөлтэй холбоотой бүхий л мэдээллийг өгч байна. Мөн “Жуулчин” наалтны зөвшөөрлийг эндээс олгож байна. Мөн гаднын улс орнуудын төлөөлөл ирсэн учраас бид туршлага судлах боломж нээгдэж байна гэлээ.

Үзэсгэлэнд улсын тусгай хамгаалалттай газар нутгууд, Шинжлэх ухааны академийн хүрээлэнгүүд ч үзэсгэлэнгийн үеэр танилцуулга хийж байгаа юм.

Ч.Суурьтогтох: Аялалын компаниуд хариуцлагатай аялал жуулчлалыг бий болгох хэрэгтэй

Орхоны хөндийн байгалийн цогцолборт газрын хамгаалалтын захиргааны аялал жуулчлалын мэргэжилтэн Ч.Суурьтогтох үзэсгэлэнд оролцож буй зорилгынхоо талаар хэлэхдээ,

-Менежментийн төлөвлөгөөгөө аяллын компаниудад танилцуулах, манай нутгаар аялагчид ямар чиглэлээр аялаж байгалийн болон түүхийн дурсгалт газруудтай танилцвал илүү сонирхолтой аялал болох талаар, байгаль хамгаалагчийн постууд хаана байрлаж байгаа зэрэг мэдээллийг үзэсгэлэнгийн үеэр өгч байна.

Аяллын компаниудад бид тусгай хамгаалалттай газар нутагт нэвтрэхэд хариуцлагатай аялал жуулчлалыг бий болгоё, төрийн хувийн хэвшил хамтран ажиллая бидэнтэй хамтран ажиллаач ээ гэж хүсэж байна гэсэн юм.

Улаанбаатур үзэсгэлэнд дотоодын аяллын хөтөлбөрүүдийг танилцуулахаас гадна манай улсад суугаа элчин сайдын яамд ч өөрсдийн орны танилцуулга, аялалын хөтөлбөрийг танилцуулж байна. Тодруулбал, Япон, Болгар, Лаос, Кувейт, Өвөрмонгол зэрэг улсууд үзэсгэлэнд оролцож байна.

Тэдний төлөөлөл болгон Япон улсын элчин сайдын яамны Соёл, боловсролын хэлтсийн дарга Ямамото Кейгогоос үзэсгэлэнд оролцож буй сэтгэгдлийг нь сонслоо.

-2020 оны Олимпийг зохион байгуулахаар болсон. Тиймээс манай улс аялал жуулчлалыг дэмжин ажиллаж байна. Тэр зорилгын хүрээнд тус үзэсгэлэнд оролцож байна. Өнөөдөр ажлын өдөр ч гэсэн хүмүүс үзэсгэлэнг их сонирхож байна. Тэгэхээр амралтын өдрүүдэд үзэсгэлэнгээр олон хүн ирж сонирхох байх гэж бодож байна. Манай яамны зүгээс Японы соёлыг хөгжүүлэх тал дээр олон үйл ажиллагааг явуулдаг. Харин одооноос эхлэн аялал жуулчлалын компаниудтай хамтран ажиллах төлөвлөгөөтэй байна хэмээн тэрээр ярьсан юм.

Үзэсгэлэнгийн үеэр иргэдэд зориулсан төрөл бүрийн илтгэл, богино хэмжээний сургалт, танилцуулгыг зохион байгуулж байгаа юм. Тухайлбал аяллын үед гэрэл зураг авах анхан шатны суурь мэдэгдэхүүн олгох, загас барих арга техник заах, үеэр ус, байгалийн аюулаас сэргийлэх сэрэмжлүүлэг, машин техникийн хөнгөн гэмтлийг засахад сургах, ууланд авирахад ямар арга техник хэрэгсэл бүрдүүлэх зэрэг сургалтууд байхаас гадна оролцогч компаниуд танилцуулга хийж байна.