Дэлхийн түүхэд нэгдүгээр сарын 5-нд болсон онцлох гурван үйл явдлыг танилцуулъя.

1968 оны нэгдүгээр сарын 5. Прагийн хавар эхлэв

Бүгд найрамдах Чехословак социалист улсад 1968 оны нэгдүгээр сарын 5-нд олон нийт коммунизмыг эсэргүүцэн жагсаж "Прагийн хавар" хэмээх хувьсгалын хөдөлгөөнийг эхлүүлэв.

Александер Дубчек Чехословакийн коммунист намын Ерөнхий нарийн бичгийн даргаар сонгогдсоноор эхэлсэн уг хөдөлгөөн долоон сарын хугацаанд үргэлжилсэн ба тус улсад эрх чөлөөг амсуулсан зурвас үе байсан.

Чехословак нь Зөвлөлт холбоот улсын Зүүн Европ дахь аж үйлдвэрийн гол түшиц газар байв. Улмаар шинэчлэлийг эсэргүүцсэн ЗХУ Варшавын гэрээний улсуудтай хамтран 1968 оны наймдугаар сард 2000 танк, 200 мянган цэрэгтэйгээр довтолж Чехословакийг эзэлсэн түүхтэй.

1980 оны нэгдүгээр сарын 5. Billboard-ын жагсаалтад багтсан анхны хип-хоп дуу

"The Sugarhill Gang" хамтлагийн хамгийн алдартай бүтээл "Rapper’s Delight" 1980 оны нэгдүгээр сарын 5-нд "Billboard"-ын шилдэг 40 дууны жагсаалтад багтсан анхны хип-хоп дуу болсон.

Rapper’s Delight дуу олны хүртээл болохоос өмнө хип-хоп урсгалыг зөвхөн Нью Йорк хотын цөөхөн дүүрэгт мэддэг байв.

Энэ төрлийн дууны цомог байдаггүй, цөөн хэдэн клубд сонсох боломжтой байх үед "I said-a hip, hop, the hippie, the hippie" гэсэн дууны үгсээр хөгжмийн шинэ урсгалын хувьсгал эхэлсэн түүхтэй.

2005 оны нэгдүгээр сарын 5. Бага гараг Эрисийг нээв

Америкийн одон орон судлаач Майк Браун, Чад Трухильо, Давид Рабиновиц нар 2005 оны нэгдүгээр сарын 5-нд Эрис бага гарагийг нээжээ.

Паломар одон орон судлалын ажиглалтын төвөөс хоёр жилийн өмнө авсан зургаас Эрис гарагийг илрүүлсэн бөгөөд эртний Грекийн домогт зөрчилдөөний охин тэнгэр хэмээн гардаг Эрис бурхны нэрийг өгчээ.

Хүний бүтээсэн сансрын хөлөг ойртож очоогүй Нарны аймгийн хамгийн том биет болох Эрисийн жин Дэлхийн ван гарагаас 27 хувиар их боловч эзлэхүүнээрээ жижиг.