Сангийн сайд Б.Жавхлан төсвийн тодотголын асуудлаар мэдээлэл өглөө. Тэрбээр "Бүх сайдын тодорхой төсөл, арга хэмжээнүүд хэмнэлтэд орсон. Тухайлбал

• Эрүүл мэндийн сайдын багцаас 69.9 тэрбум,
• Хот байгуулалт, барилга, орон сууцжуулалтын сайдын багцаас 36 тэрбум,
• Боловсрол, Зам тээврийн сайдын багцаас тус бүр 33 тэрбум, 
• Соёл, спорт, аялал жуулчлал, залуучуудын сайдын багцаас 19.7 тэрбум,
• Бусад сайдын багцаас 122.7 тэрбум гээд нийт 535.9 тэрбум төгрөгийн 130 төсөл, арга хэмжээ хэмнэлтэд тооцогдлоо. 

Гэхдээ энэ нь тодотгол биш, Төрийн хэмнэлтийн тухай хуулийн дагуу гаргасан шийдвэр. Ерөнхий сайд хэмнэлтийн тодотгол хийхээ зарласан. Засгийн газрын хурлаар Төсвийн тухай хуулийн дагуу энэ ажиллагааг эхлүүлж байна. Төсвийн тодотгол эхлэхээс 14 хоногийн өмнө хэлэлцүүлэг эхэлсэн байх ёстой гэж заасан байдаг. Иймд өнөөдрөөс тодотголын төслийг хэлэлцэж эхэлж байна" гэв. 

Тэрбээр үргэлжлүүлэн "Суурь бүтэц болох боловсрол, эрүүл мэндийн салбарын төсөвт гар хүрэхгүйгээр төсвийн тодотгол хийхээр төлөвлөсөн. Үлдэж буй 2.3 их наяд төгрөг бусад яам, сайдад маш хүнд тусаж байна. Өөрөөр хэлбэл Засгийн газрын зарим нэг үйл ажиллагааг зогсоох хүртэл арга хэмжээ авна гэсэн үг. 

2.3 их наяд гэдэг дүн нь орлого тасалдах дүн. Үүний 535 тэрбумыг нь Төрийн хэмнэлтийн тухай хуулиар хэмнэсэн гэсэн үг. Иймд төсвийн тодотгол 1.8 их наяд төгрөгөөр хийгдэнэ. Зардлын тодотголыг орлого тасалдаж буй дүнтэй тэнцүүлнэ. Хэрэв нэмж алдагдалд орж, хэмжээ нь ДНБ-ий 3 хувьд хүрэх эрсдэл үүсвэл дахиад тодотгол хийх ёстой. 

Өнөөдрөөс хэлэлцүүлэг эхэлсэн, олон талаас мэдээлэл, судалгаа авч танилцана. УИХ-д өргөн барьтал 14 хоногийн хугацаа байна. Гадаад нөхцөл байдалтай холбоотойгоор 2026 оны төсөв ч энэ удаагийн тодотгосон дүнгээс илүү гарахгүй гэж тооцох хэрэгтэй.

Төсөв тодотгохдоо хэд хэдэн зарчим баримталсан. Үүнд төрийн албыг аль болох цомхон, бүтээмжтэй, хүртээмжтэй байлгахад анхаарсан. Төсөв 33 их наяд төгрөг. Үүний найм нь төсвийн хөрөнгө оруулалт, 25 нь урсгал зардал байдаг. Үүний гуравны нэг нь цалингийн сан. Хэн нэгнийг халахдаа биш, сул орон тоон дээр нэмж хүн авахгүй байх, ажил үүргийн давхардлыг арилгах байдлаар ажиллана. 

Мөн Төв банкны валютын нөөцийг хамгаалах зарчим баримталж байна. Импортоо багасгаж, экспортоо нэмэгдүүлнэ. Хэмнэж болох бүх зардлаа хэмнэнэ" гэлээ.