УИХ-ын чуулганы хуралдаанд УИХ-ын гишүүн С.Эрдэнэболд үг хэллээ. Тэрбээр "38-61 насны 19 сайд байна. Харьцангуй залуу. Т.Аубакир гишүүнийг үндэсний цөөнхийн төлөөлөл болгон оруулж иржээ. Сэтгэл дундуур байгаа зүйл нь эмэгтэй сайд нар цөөхөн байна. 

Энэ бол монгол төрийн Засгийн газар шүү. Аль нэг намынх биш. Ажил үйлсдээ өсөрхөж биш жудагтай хандаарай гэж эхнээс нь захиж хэлмээр байна. Ажилдаа очоод намчирхаад, халаа сэлгээ хийж, ялгаварлан гадуурхсан сайдыг онцолж байгаад огцруулна шүү.

Өмнөх Засгийн газар АН, МАН, Хүн намын мөрийн хөтөлбөр 85.9 хувийн ижилсэлтэй гэж байсан. Энэ хөтөлбөр үргэлжлэх юм байна.

Нэг хүсэлт байна. Монгол Улс бол парламентын засаглалтай улс. Гэтэл Засгийн газрын гишүүд нь цул алтан тэмдэг зүүдэг. УИХ-ын гишүүд 350 мянган төгрөгний үнэтэй мөнгөн зүүлттэй. Цаагуураа алт, мөнгөөр ялгаад Засгийн газрын гишүүд илүү чухал гэдэг ойлголт төрүүлээд байна. Тиймээс шинэ гишүүдийг алт биш энгэрийн тэмдэг зүүлгэх ёстой" гэв.