Хавар болохоор хөнөөлт хортон шавьж ойн модны шилмүүс, навчыг идэж эхэлдэг. 2-3 жил дараалан идэгдсэн ой дахин сэргэж ургадаггүй. Үүнээс урьдчилан сэргийлэхийн тулд Нийслэлийн байгаль хамгаалах газраас хөнөөлт хортон шавьжийг есдүгээр сарны 20-ноос өнгөрөгч долоо хоногийг дуустал устгалаа.
Энэ талаар тус газрын мэргэжилтэн Ж.Амармаагаас тодруулав.

- Зуслангийн ам буюу Шадивлан, Яргайт, Зуун мод зэрэг газарт нийт 1000 га талбайд хортон шавьж устгах ажлыг хийсэн.

- Зуны улиралд хортон шавьжийг устгадаг. Намар хийсэн нь ямар учиртай вэ?
- Бид тавдугаар сараас өнөөдрийг хүртэл 8534 га газарт шавьж устгал хийсэн. Заавал зун эсвэл намар хийх албагүй. Хамгийн чухал нь ойг хортон шавьжид идэгдэхээс өмнө цэвэрлэх хэрэгтэй.

- Тэгвэл ямар шавьж ойг илүү их идэж байна вэ?
- Сибирийн болон өрөөсгөл хүр эрвээхэй. Эдгээр эрвээхэй хүрэнцрийнхээ үед шилмүүс, навч иддэг. Тиймээс бид хүрэнцэр болж амжаагүй өндгийг нь устгалаа. Бие гүйцсэн эрвээхэй ойд хор хөнөөлгүй шүү дээ.

-  Ямар аргаар устгал хийв?
- Өрөөсгөл хүр эрвээхэйн хувьд хадны асга, байшингийн булан тохойд өндөглөдөг. Үүнийг нь хусч аваад шатааж эсвэл булж устгана. Хэрэв хүрэнцэр болчихвол хүйтрэхээр хөрсөнд өвөлжөөд хавар нь ойг сүйтгэчихдэг.

- Тусгай багаж хэрэгсэл, химийн бодис хэрэглэдэг үү?
- Ойн хортон шавьж устгахад тохирсон сумаасид гэдэг химийн бодис, биокомбинатын үйлдвэрлэдэг бактерийн бэлдмэл бий. Шаардлагатай үед зориулалтын цацдаг бодисоо нисдэг тэргэнд бэхлээд шүршдэг.

А.Амартүвшин