Монголын Үндэсний статистикийн хорооноос зохион байгуулдаг хөдөө аж ахуйн тооллого, түүвэр судалгаа өнөөдрөөс эхэллээ.

Дархан-Уул аймгийн тооллогод урьдчилсан байдлаар Хөдөө аж ахуйн үйл ажиллагаа эрхлэгч 2000-аад айл өрх, 120 гаруй аж ахуйн нэгж хамрагдана гэсэн дүн гарчээ.

Эдгээр аж ахуйн нэгж болон айл, өрхийг нийт 54 тоологч тоолох бөгөөд өдөр бүр тооллогын явц, мэдээ, тооллогын материалыг сумын тооллогын комисс хүлээн авч шалгаж нэгтгэн аймгийн комисст мэдээлж байх гэнэ.

Монгол Улсын Статистикийн тухай хууль болон Засгийн газрын 137 тоот тогтоолын дагуу зохион байгуулдаг уг судалгаа ирэх зургадугаар сарын 15-ныг хүртэл үргэлжилж, газар тариалангийн үйл ажиллагаа эрхэлдэг өрх, аж ахуйн нэгж, байгууллагыг бүрэн хамруулах ажээ.

Тооллогын үр дүнд хөдөө аж ахуйн салбарын үндсэн үзүүлэлтүүдээс гадна хөдөөгийн хөгжил, байгаль орчин, ус, газар ашиглалт, цөлжилт, загас, ойн аж ахуйн талаарх мэдээлэл, түүнчлэн хөдөө аж ахуйн үйл ажиллагаа эрхэлж буй өрхийн үйлдвэрлэл, орлого, зардал, хүнсний хомсдол, хангамж, санхүү, мал эмнэлгийн үйлчилгээ зэрэг бусад нэмэлт мэдээллийг бүрдүүлнэ.

ХАА-н тооллого нь 10 жилд нэг удаа явагддаг юм байна.