Засгийн газрын хэрэг эрхлэх газрын дарга Л.Оюун-Эрдэнэ "Монгол Улсын урт хугацааны хөгжлийн бодлого 2050" буюу "Алсын хараа 2050" бодлогын баримт бичгийн төслийг УИХ-ын даргад өргөн барилаа.

Ерөнхий сайдын 2019 оны дөрөвдүгээр сарын 30-ны өдрийн 52 тоот захирамжаар Монгол Улсын урт хугацааны хөгжлийн бодлогыг олон улсын болон бүс нутгийн хөгжлийн чиг хандлага, хөрш орнуудын хөгжлийн бодлоготой уялдуулан шинжлэх ухааны үндэслэлтэй боловсруулах, үүнийг урт хугацааны хөгжлийн бодлого болон өнгөрсөн 30 жилийн алдаа, онооны дүгнэлт бусад бодлогын баримт бичгүүдийн уялдааг бүхэлд нь үнэлэх цаашдын бодлогын төлөвлөлт гаргах ажлын хэсгийг байгуулсан. 

Энэ дагуу тушаалаар 596 эрдэмтэн, тогтоолд ороогүй нийт 1500 гаруй эрдэмтэн судлаачид, 11400 орчим иргэд хэлэлцүүлэгт хамрагдан долоон сарын хугацаанд энэ баримт бичгийг боловсруулсан бөгөөд энэ оны нэгдүгээр сарын 3-ны өдөр Ерөнхий сайдад өргөн барьсан юм. 

Өнгөрсөн долоон сарын хугацаанд ажлын хэсэг, ажлын дэд хэсэг хуралдаж, есөн тулгуур багана бүхий 50 зорилттой бичиг баримтыг салбар бүрийн шилдэг судлаач, эрдэмтэд нэг баг болон ажилласны үндсэн дээр боловсруулжээ. Есөн тулгуур баганад

1. Үндэсний үнэт зүйл, 
2. Хүний хөгжил,
3. амьдралын чанар ба дундаж давхарга,
4. эдийн засаг,
5. сайн засаглал,
6. ногоон хөгжил,
7. амар тайван аюулгүй нийгэм,
8. бүсчилсэн хөгжил,
9. Улаанбаатар ба дагуул хот багтаж байгаа аж. 

ЗГХЭГ-ын дарга Л.Оюун-Эрдэнэ хамгийн сүүлийн үеийн эдийн засгийн судалгаа, олон улсын байгууллагуудтай хамтран ажилласан гэдгийг хэллээ.

УИХ-ын хаврын чуулганаар хэлэлцэх асуудлын дараалалд хөгжлийн бодлого, алсын хараа төслийг хэлэлцэн батлахаар тусгасан болохыг УИХ-ын дарга Г.Занданшатар мэдээллээ. 

Тэрбээр "Ийм их баялагтай, эрдэм чадалтай улс хөгжихгүй байгаа нь тогтвортой хөгжлийн бодлогогүй байгаатай шууд холбоотой. Иймд алсын хараа, хөгжлийн бодлогыг энэ хаврын чуулганаар хэлэлцэн батлахаар болсон" гэв.

Уншигч та “Алсын хараа 2050” Монгол Улсын урт хугацааны хөгжлийн бодлогын баримт бичгийн төсөлтэй танилцах бол ЭНД дарна уу.

ЗГХЭГ-ын дарга Л.Оюун-Эрдэнэ хөгжлийн баримт бичгийг УИХ-ын даргад өргөн барьсныхаа дараа мэдээлэл хийж байна. 

ЗГХЭГ-ын дарга Л.Оюун-Эрдэнэ "Дэлхийн 20 орчим улс орны, манай улстай эдийн засаг, нийгмийн харилцаатай улс орны урт хугацааны хөгжлийн бодлогыг судалсны үндсэн дээр найман сарын хугацаанд хөгжлийн бодлого төлөвлөлтийг боловсруулсан. Бид хаана хүрэх юм тэнд хүрэхийн тулд хэрхэн, ямар замаар явах вэ гэдгийг тодорхойлохын тулд олон эрдэмтэд олон улсын байгууллагууд хамтран ажилласан. Өнөөдрөөс УИХ-ын гишүүдэд тарааж, байнгын хороодоор хэлэлцээд явна. Шинэ коронавирусын халдварын эрсдэлтэй холбоотойгоор төлөвлөсөн хэлэлцүүлгүүд хойшилж байгаа хэдий ч цахим хэлэлцүүлгүүдийг өрнүүлээд явна. Өнгөрсөн 30 жилийн хугацаанд гаргасан нийт 517 бодлогын баримт бичгийг нэгтгэн энэ баримт бичигт тусгасан. Цуврал хэлэлцүүлгүүдэд нухацтай хандах хэрэгтэй тул иргэдэд мэдээлэл өгөх чиглэлээр Засгийн газар ажиллана" гэв