Дэлхий даяар сая сая үзэгчдийн сэтгэлд хадагдаж, зураг авалт явагдсан газрын аялал жуулчлалын урсгалд нөлөөлсөн маш олон алдартай кинонууд байдаг. Үзэгчдийн сэтгэл зүйд нөлөөлж, жуулчдыг татах зорилготой буюу захиалгат кинонууд ч нэлээд бий. Зарим нь бүр тухайн зорих газруудын эрэлтэд 25%-300% нөлөөлж, орон нутгийн эдийн засагт урт хугацааны эерэг нөлөөг үзүүлсээр байна.

Киноны баатруудын ярьсан түүх, хийсэн үйлдлийг туршиж үзэх, биеэр мэдрэх эсвэл зүгээр л зураг даруулах зорилгоор зураг авалт хийсэн байршилд очих хүсэл нь аяллын сэдэл болоод удаж байна даа. Тэгвэл эх орны минь хосгүй үзэсгэлэнг дүрсжүүлэн, эх орноороо аялах хүслийг эрхгүй төрүүлэх дараах кино дотоодын аялал жуулчлалд хэрхэн нөлөөлсөн талаар ярилцацгаая.

Зарим нь бүр тухайн зорих газруудын эрэлтэд 25%-300% нөлөөлж, орон нутгийн эдийн засагт урт хугацааны эерэг нөлөөг үзүүлсээр байна

... Салхи исгэрч уулс хүнгэнээд, гол ус хариглан гогцоорч навч нахиа сэрчигнэн уянгалахыг бас жавартай шөнө тэнгэрийн одод жингэнэхийг, Гангын халуунд нарны алтан илтэс газарт шаргин буухыг зүрх сэтгэлээрээ мэдрэн баясахын тулд чи амьд байх ёстой... Санаж байна уу? “Говийн домог”-ийг. Бодоход л сэтгэл хөдөлж, зүрх эх орны төлөө цохилох шиг болдог. Магадгүй киноны гол зорилго энэ болов уу?. Гайхамшигт Говийн нууцын багагүй хэсгээс дэлгэсэн уг кино хэнийг ч болов Говь нутгаар аялах, говийн байгалийн үзэсгэлэнг мэдрэх, эх орон минь хосгүй үзэсгэлэнтэй, дахин давтагдашгүй өнгө төрхтэй гэдгийг мэдрүүлнэ. Кино үзэгчдэд хүрч эхэлсэн цагаасаа Говийг зорих аялагчдыг идэвхижүүлсэн.

Монголчууд сүүлийн жилүүдэд Хөвсгөл болоод баруун аймгуудаар илүүтэй аялж байгааг та анзаарсан уу? “Single Ladies 3” киноны зураг авалт хийгдсэн газрын байгалийн үзэсгэлэнг тус киног үзсэн хүн бүр л шагшин ярьцгааж, аялах газраа олох шиг л болцгоосон билээ. Үнэхээр л бидний мэдэхгүй Баян-Өлгийн гайхалтай байгаль, ёс заншлын хэсгээс харуулсан нь аялагчдын хорхойг хөдөлгөсөн сайхан маркетинг болсон юм.

Бидний мэдэхгүй Баян-Өлгийн гайхалтай байгаль, ёс заншлын хэсгээс харуулсан нь аялагчдын хорхойг хөдөлгөсөн сайхан маркетинг болсон

Үүгээр ч зогсохгүй Хүйсийн найман нуурын байгалийн сайхныг тод томруунаар уг киноноос харж болох юм. Гол дүрийн бүсгүй Ари гаднын орон биш эх орноо сонгосноор 3 найзын адал явдал эхэлдэг. Цэлмэг хөх тэнгэр, цэнхэртэх уулс, гол мөрөн гээд л байгалийн сайхныг эмэгтэй хүний гоо үзэсгэлэнтэй хослуулан дэлгэцнээ буулгасан нь бүсгүйчүүдийн аялах, байгальд зургаа даруулах цаашлаад чамин дэгжин болоод үндэсний хувцас сонголтод хүртэл хүчтэй нөлөөлсөн гэж хэлж болно. Мөн үндэстэн бүрийн ялгаа болоод аялал хэр адал явдалтай байдгийг ухуулж өгсөн тун чиг харах, үзэх зүйлтэй кино болсон. Кино гарч эхэлсэн жилээс Хүйсийн найман нуур, баруун аймгаар аялах аялагчдын тоо эрс өссөн нь үнэн. Найзуудаараа аялж гол дүрийн 3 бүсгүй тойрч суугаад ярьдаг шиг Монгол дээлээрээ гоёсон гээд л уг киноноос бүсгүйчүүд маань авах пооз, сонирхох загвартай болсон билээ.

Дараагийн дурдах кино бол гарч эхэлсэн даруйдаа олон улсын кино наадмаас урилга хүлээн авч байсан “Содура”. Монголын олон угсаатнуудын нэг Цаатан ард түмний амьдралын талаар бага ч гэсэн ойлголтыг өгсөн, Хөвсгөлийн гүн тайга, Цаатан түмний өв соёл, амьдралыг хэв маяг, одоо хэрхэн амьдардаг болоод хэр их зовлон үзсэнийг өгүүлэх уг кино бидэнд очиж үзэхсэн гэсэн хүсэл эрхгүй төрүүлж байсан учраас гадаадын жуулчид л зорьдог шахуу ойлгогдож байсан Тайгыг дотоодын жуулчид маань зорих болжээ.

Тайгын амьдрал Содура дээр гардагтай яг таг адил биш ч ер бусын онцгой мэдрэмж, байгаль орчин нь сүрлэг хийгээд амирлангуй тайван байдлыг танд мэдрүүлэх болно. Үзэсгэлэнт тайгын амьдралыг кониноос үзээд дараа нь бодитоор мэдрээрэй.

Эх сурвалж: www.joinme.mn  Аялал, амралтын хөтөч