Д.Долгорсүрэн зааны хөвгүүдийн дуулиан дуусахгүй нь бололтой. Түүний дунд хүү Монгол Улсын Хөдөлмөрийн баатар, Японы мэргэжлийн сүмогийн 68 дахь их аварга Д.Дагвадорж зодог тайлах болсноо мэдэгдээд сарын хугацаа өнгөрөөд байна.

Түүнийг зодог тайлах мэдэгдэл хийсний дараа ах Д.Сумъяабазар нь Сар шинийн барилдаанд барилдахгүй байхаар шийдсэн тухай ч яриа дэгдсэн.  Ганц сар шинийн бөхийн барилдааныг Д.Сумъяабазар аварга өнжиж байгаа биш бололтой.

Олон түмний хүндэтгэлээр аварга цолыг хүртсэн түүнийг  зодог тайлах шийдвэр гаргасан байж магадгүй хэмээн бөх сонирхогчид ярьж байна. Гэхдээ тэрбээр А.Сүхбат аварга шиг олонд албан ёсоор энэ тухайгаа мэдэгдэхгүй чимээгүйхэн бөхөөсөө холдох байх хэмээн тэд таамаг тавин сууна.  Д.Сумъяабазар аварга сүүлийн үед заалны барилдаанд огт барилдахгүй болсон нь түүнийг зодог тайлж магадгүй гэсэн яриаг улам бүр дэвэргэж байгаа юм.

Үндэсний бөхийн отгон аварга зодог тайлж магадгүй  нь гэсэн шуугиантай зэрэгцэн түүнийг гэргий мисс Ч.Мичидмаагаасаа өрх тусгаарлах гэж байгаа тухай мэдээлэл тараад байна. Шар хэвлэлүүдийн байнгын сэдэв болдог Д.Сумъяабазар, Ч.Мичидмаа нарын хамтын амьдрал ийнхүү эцэс болох шалтгаан нь Б.Уянга гэж бүсгүй бололтой. Энэ тухай буюу 20 гаруйхан  настай Б.Уянга гэж бүсгүйгээс болж Монголын сайхан бүсгүй өргөмжлөлт Ч.Мичидмаа төрхөмдөө буцах болсон талаар хэвлэлүүд ид бичиж байна.

Хүний хувийн амьдрал руу өнгийх нь муухай ч угаас олны танил хүмүүсийн гэр бүл, хайр сэтгэлийн асуудал сонирхолтой сэдвийн нэг хэвээр байсаар байгаа билээ. Ар гэрийн амьдрал хаашаа ч эргэсэн ард олны хүндэтгэлээр аварга цолыг хүртсэн аварга Д.Сумъяабазар үнэхээр зодог тайлах цаг болсон уу гэдэг асуултыг уншигч танд үлдээе.

Үндэсний бөхийн отгон аварга, бас нэгэн чимэг Д.Сумъяабазар аваргыг Ардын хувьсгалын 89 жилийн ойн Үндэсний баяр наадамд зодоглох байх хэмээн бөх сонирхогчид найдан сууна.
 
Ч.Молор