Иргэний хөдөлгөөний намын YI Бага хурал болж, намаасаа УИХ-ын 24-р тойргийн нөхөн сонгуульд дэд дарга М.Ичинноровыг нэр дэвшүүлэх шийдвэрийг гаргасан билээ.

АНУ-д ажиллаж байсан хүний эрхийн хуульч М.Ичинноров энэхүү шийдвэрийн улмаас эх орондоо иржээ.

Харин өнөөдөр МНН, МСДН, ИХН-аас /Иргэний эвсэл/ хамтарсан хэвлэлийн хурлыг зарлаж, Иргэний эвслийн зүгээс Ардчилсан намыг нөхөн сонгуульд дэмжиж оролцохоо илэрхийллээ. Энэхүү шийдвэрээ Иргэний хөдөлгөөний намын дэд дарга М.Ичинноров тайлбарлахдаа:

-Намайг олон хүн дэмжиж байсан. Намайг дэмжиж байсан та бүхэнд баярлалаа. Манай намын зүгээс нэр дэвшсэн бол ялах магадлал байсан. Гэхдээ бид гурван намын хамтарсан эвслийг байгуулсан. Энэхүү эвслийн шийдвэрээр би нэрээ татаж, сонгуульд эвслийн зүгээс Ардчилсан намыг дэмжиж оролцохоор боллоо. Энэ шийдвэрийг гаргах болсон шалтгаан нь бид нэгэнт бий болгосон ардчиллын үнэт зүйлсээ улам батжуулахыг, илүү ахиулахыг хүссэнээс үүдэлтэй. Бид Ерөнхийлөгчийн сонгуульд АН-тай эвсэн орсноор Ардчилсан Ерөнхийлөгчийг гаргаж чадсан гавъяатай. Тиймээс энэ удаа ч дахин ардчиллыг дэмжих зайлшгүй шаардлагатай юм. Энэ бол эрх мэдлийн төлөө бус ирээдүйн төлөө гаргаж байгаа том алхам гэлээ.

Мөн энэ үеэр хүний эрхийн хуульч М.Ичинноров долдугаар сарын 1-ний үймээний үеэр Иргэний хөдөлгөөний намын нэг гишүүний нүд рүү буудаж, сохолсон тул түүний эрхийн төлөө ажиллахаа мэдэгдлээ.

М.Жаргал