Жилийн өмнө Сэлэнгэ аймгийн Мандал суманд гарсан ой хээрийн түймрийг унтраахаар яваад амь эрсэдсэн ОБЕГ-ын ажилтнуудын ажил үйлсийг алдаршуулахаар зорьжээ.

Энэ ч утгаараа, тэдний тухай бүрэн хэмжээний уран сайхны кино хийх ажлыг төлөвлөсөн байна. Уг ажлыг "МИ 8"-ын ослоор амь үрэгдсэн Д.Батбаатар агсны гэргий Г.Баяржаргал санаачилсан бөгөөд өөрөө зохион байгуулахаар шийдсэн аж.

Харин киногоо хийхийн тулд сайн зохиолын эрэлд гарсан тухайгаа мэдэгдэж, кино зохиолчдод хандсан хэвлэлийн хурал хийлгэлээ, өчигдөр. Улмаар Онцгой байдлын албаны эх орныхоо өмнө хүлээсэн үүргийг алдаршуулах сайн кино зохиол бичсэн шилдэг зохиолчид нэг сая төгрөгийн урамшуулал хүртээх болзол хүртэл гаргасан аж. Энэ тухайгаа хэлэхдээ "Хань маань амьд сэрүүн байхдаа онцгой байдлын албанд зүтгэж буй залуучуудад урам зориг өгөхүйц кино хийх юмсан гэж ярьдаг байлаа. Тэр хүслийг нь би гүйцэлдүүлэхээр шийдсэн. Энэ зөвхөн миний санаачилсан ажил биш” хэмээн ярилаа. Сонирхолтой нь киноны баг аль хэдийнэ бэлэн болсон ч өдгөө зохиолоо л хүлээж байгаа ажээ.

Ерөнхий найруулагчаар "Жин дунгуй", "Ядуугийн зовлон" киногоороо олонд танигдсан МҮОНТ-ийн найруулагч Б.Энхтөр ажиллах гэнэ.

Кино зохиолын гол утга санаа нь онцгой байдлын албаны ачаа хүнд, эх орныхоо төлөө байнга бэлэн байдалд байдаг, хариуцлагатай, бахархаж хүндэтгэмээр ажил гэдгийг харуулсан байх шаардлагатай аж.