АН-ын гишүүн, ХЗДХ-ийн сайд О.Алтангэрэлээс сэтгүүлчид Ерөнхий сайдыг огцруулах, эсэх  талаарх байр суурийг нь асуув.   

-Ерөнхий сайдын хөрөнгө орлогыг шалгаж, хууль бус гэдэг нь батлагдвал хариуцлага тооцох боломжтой. Өнөөдөр АН-ын бүлгийн хурлаар энэ асуудлыг хэлэлцээгүй. Шалгаж тогтоодог тусдаа байгууллага бий. Би Хууль зүйн сайд боловч хэрэг мөрдөхгүй, шалгахгүй.
 
-Та улс төрийн манлайлал гарган,сайдын ажлаасаа огцрох уу?
-Хүний эрхийг хангах 10-аад хуулийн төслийг бид боловсруулан өргөн барих гэж байна. Бидэнд сонгогчдод өгсөн амлалт гэж бий. 2028 он хүртэл хийх ажлынхаа төлөвлөгөөг УИХ-аар батлуулан ажиллаж байна. АН-ын Үндэсний бодлогын хороо, бүлгийн шийдвэр гарсан. Энэ үндсэн дээр л асуудалд хандаж байна. Хууль бус хөрөнгийг хураах хуулийн төслөө батлуулмаар байна.

-Хууль бус хүн таны яг хажууд байна шүү дээ.
-Энэ нь та бүхний бодол. Хуулийн байгууллага батална.

-Бодол биш.         
-Ерөнхий сайдын мэдэгдлийг үзсэн. Шалгуулахад бэлэн байгаа юм байна, ард түмэнээсээ уучлал гуйлаа. Одоо улс төрийн өрнөлийн цаана байгаа хэсэг бүлэг байна. Хэн бэ гэдгийг та бүхэн хэлсэн хүнээс нь асуу.               

-Жагсагчдын дуу хоолойг сонсов уу. Та тэдний шаардлагатай санал нийлэх үү?
-Сонссон. Хөрөнгө орлогоо шалгуулах гэх мэт шаардлагатай нь би санал нийлнэ. Хууль бусаар хөрөнгөжсөн бол хариуцлага үүрэх ёстой.