УИХ-ын чуулганы өнөөдрийн хуралдаанаар Цөмийн энергийн тухай хуулийн нэмэлт өөрчлөлтийг хэлэлцэв. Хуулийн төслийн эхний хэлэлцүүлэг өнгөрсөн долоо хоногт болсон. Өчигдөр УИХ-ын Аюулгүй байдал, гадаад бодлогын байнгын хороо энэ төслийг хэлэлцэж, УИХ-ын гишүүн Ц.Даваасүрэн 9 хувийн АМНАТ-ыг цацраг идэвхт ашигт малтмал олборлох, боловсруулах төслүүдээс авах санал гаргажээ.

Байнгын хорооны хуралдаанд оролцсон гишүүдийн дийлэнх саналыг дэмжжээ. Харин Аж үйлдвэр, эрдэс баялгийн сайд Ц.Туваан АМНАТ-ыг 9 хувиар тогтоовол Францын Орано групптэй хийх Хөрөнгө оруулалтын гэрээний хэлэлцээ зогсоно гэв. Энэ гэрээг байгуулснаар Монгол-Францын хамтарсан Зөөвч-Овоо ордыг ашиглах хуулийн орчин бүрдэх юм.  

УИХ-ын гишүүн П.Сайнзориг  дэлхий нийт ураны олборлолтод АМНАТ-ыг 3-5 хувиар ногдуулж байхад бид 14 хувь, үнэ өсвөл бараг 19 хувийг авна гэх нь Монгол Улсад хөрөнгө оруулалт хэрэггүй гэсэнтэй адил хэмээгээд энэ асуудалд ажлыг хэсэг тодорхой хариулт өгөх шаардлагатай гэв.

Сангийн сайд Б.Жавхлан өнөөдөр чуулганы хуралдаанаар, АМНАТ-ын 65 хувь нь Ирээдүйн өв санд, 35 хувь нь Орон нутгийн хөгжлийн санд төвлөрнө. Төсөл амжилттай хэрэгжвэл орон нутгийн хөгжилд их хувь нэмэр оруулна гэсэн юм.

УИХ-ын гишүүн Б.Пүрэвдорж, АМНАТ дэлхий дахинд дунджаар 5.5 хувь байна. Ураны хамгийн их нөөцтэй Казахстанд 6, Австрали, Канад, Нигери тус бүр 5, Узбекистанд 8 хувь байна гэв.

Харин хуулийн төсөлд цацраг идэвхт ашигт малтмалын зах зээлийн үнийн өсөлтөөс хамаарч, ашигт малтмалын нөөц ашигласны төлбөрийг 0-130 ам.доллараар ангилж, 0-9 хувь хүртэл тооцно гэж заажээ. Хуульд нийт гурван төрлийн АМНАТ авахаар тусгасан.

Суурь болон өсөн нэмэгдэх АМНАТ. Харин тусгай АМНАТ-ыг тухайн ордын онцлогоос хамааран Улсын Их Хурал тухай бүрд нь тогтоох юм байна. Өсөн нэмэгдэх АМНАТ-ийн тооцогдож эхлэх нь 50 ам.доллар. 50-аас доош бол өсөн нэмэгдэх байхгүй.