Иргэдийн дунд даатгал нөхөн төлбөрөө өгдөггүй гэсэн аман яриа байнга явж байдаг. Харин даатгалынхан болохоор жил бүр олон зуун мянган иргэдэд нөхөн төлбөр олгодог, зарим иргэд гэрээгээ сайн ойлгодоггүй, даатгалын зарчмыг мэдэхгүйгээс болж бухимдаж яриа гаргадаг гэсэн тайлбар хийдэг.

Монгол Улсын хувьд банк, даатгал, хөрөнгийн зах гэсэн 3 санхүүгийн салбартай. Гэтэл банкны салбар нь нийт санхүүгийн салбарын 97 хувийг эзэлж байна гэсэн тоо баримт бий. Өөрөөр хэлбэл бид даатгал ба хөрөнгийн захаа хөгжүүлэхийг мартсан гэсэн үг.

Энэ талаар эдийн засагч нар банк, даатгал, хөрөнгийн захыг хүний элэг, зүрх, уушги гэж ойлгох хэрэгтэй. Хэрэв элэг, зүрх хоёр нь муу бол хэчнээн сайн уушгитай байгаад асуудал үүснэ гэх маягаар тайлбарладаг.

Үнэндээ монголын эдийн засагт зээлийн өндөр хүү, инфляц, зээлийн олдоц гээд маш олон асуудал байдаг. Үүний цаад шалтгааныг даатгал ба хөрөнгийн зах зээл сайн хөгжөөгүй байгаатай холбон тайлбарлаж байна.

Судлаачдын хэлж байгаагаар даатгалын салбар өөрийн зохих ёсны үүргээ гүйцэтгэхийн тулд дахиад 5-10 дахин өсөх ёстой гэж байна. Даатгалын салбар хэдий чинээ том байж гэмээнэ иргэд, компаниудын эрсдэлийг даах чадвар нь нэмэгдэнэ. Магадгүй нөхөн төлбөрийн үйлчилгээ улам сайжирна.

Сайн мэдээ гэвэл Даатгалын Тухай Хуулийн шинэчилсэн найруулгыг Санхүүгийн Зохицуулах Хороо, Сангийн Яам тэргүүтэй байгууллагууд боловсруулж байгаа бөгөөд тун удахгүй УИХ-аар хэлэлцэгдэх ажээ. Энэ хуулиар даатгалын салбарт шинэ боломжуудыг нээж өгч, анх удаа даатгалын салбарыг бодитой хөгжүүлэх асуудлыг төр хэлэлцэх нь ээ.

Шинэ хууль гарснаар даатгалын салбар огцом өсөж, банкны салбарын хийж чадахгүй байгаа үүргүүдийг гүйцэтгэх боломж гарна гэж даатгалын салбарынхан хэлж байна. Шинэ хуулийн хүлээлтээр даатгалын салбарт хөрөнгө оруулах сонирхолтой хөрөнгө оруулагч нарын тоо ч нэмэгдэж байгаа аж.

Бид энэ нийтлэлээр 2024 оны 2 ба 3-р улирлын даатгалын салбарын тойм тоонуудыг харуулж байна.  

Даатгалын компанийн үйл ажиллагааны бас нэг чиглэл нь хөрөнгө оруулалт байдаг. Банк иргэдээс хадгаламж хэлбэрээр мөнгө татаж, эргүүлээд зээл олгон ашиг олдог бол даатгал нь даатгалын хураамжийг нөхөн төлбөрт гарах хүртэл тухайн даатгалын хураамжаар компаниудын хувьцаа, бонд, итгэлцэлд хөрөнгө оруулж ашиг олдог. Ингэснээрээ хөрөнгийн захын хөгжилд маш том хувь нэмрээ оруулдаг байна.